iklan

DESPORTU, HEADLINE

Halakon Ostico 1-0, Aimou FC avansa ba oitavu finál

Halakon Ostico 1-0, Aimou FC avansa ba oitavu finál

DILI, 19 juñu 2024 (TATOLI) – Ekipa istimadu husi Munisipiu Viqueque Aimou FC susesu iha nia jornada hodi manán adversáriu Ostico FC ho eskore mihis 1-0, iha jogu faze 16 finál kopa Maun Boot Kay Rala Xanana Gusmão ne’ebé realiza iha Estádiu Munisipál Dili, kuarta loraik ne’e.

Vitória ne’ebé Aimou gaña lori ekipa ne’e avansa kedan ba jogu oitavu finál ne’ebé sei akontese iha semana oin mai.

Bainhira jogu la’o jogadór sira lansa kedan kontra no atake ba malu tuir tékniku no abilidade ne’ebé haraik ona husi treinadór sira.

Ostico lansa atake ne’ebé másimu maibé sempre falla iha finalidade, nune’e susar atu halo golu. Aimou mós la nonok, responde hasoru atake ne’ebé armada Ostico halo maibé ekipa rua kontinua hatudu forsa ne’ebé hanesan.

Avansadu Ostico hetan oportunidade bola livre barak maibé la konsege ezekuta ho di’ak, sutu barak Ostico halo maibé nunka kona iha alvu, sutu balu mós salva husi guarda rede.

La’os de’it Ostico, maibé Aimou mós hetan oportunidade barak liuliu domina iha lina oin Ostico nian, maibé falla atu halo golu tanba defeza Ostico halo blokeia metin.

Adeptus atus ba atus tuur nahe-aan iha tribun leten hakilar fó kontente ba sira nia ekipa favoritu halo jogadór sira hatudu jogu bonitu liutan.

Maibé esforsu hotu ne’ebé ekipa rua halo hela de’it hanesan esforsu tanba to’o minutu primeira parte termina laiha tan golu ruma mak akontese nune’e ekipa rua tenke hela provijoriu ho rezultadu 0-0.

Hakat ba segunda parte ekipa rua kontinua lansa kontra no atak ne’ebé ho másimu ba malu, maibé Aimou domina liu bola halo Ostico susar atu hatudu jogu ne’ebé ho intensidade aas.

Avansadu Aimou kontinua haka’as aan maka’as ho tékniku hotu, kontinua lansa jogu ho modelu ofensivu no brani hatudu jogu individu hodi sobu defeza Ostico nian, nune’e iha minutu 44 avansadu Aimou ho defeza Ostico nian halo kontra no atake iha lina oin Ostico nian, bola kona liu ba defeza Ostico nia liman árbitru deside fó kedan penaliade.

Penalidade ba Aimou utiliza sira nia kompetensia hotu hodi lansa sutu livre tuir kultura futeból nian. Sutu livre ne’e ezekuta husi jogadór Deonisio Lopes (7). Sutu ne’ebé Deonisio ezekuta tama liu ba rede Ostico nia laran muda kedan rezultadu ba 1-0.

Golu ne’e hanesan golu vitoria ba Aimou tanba jogadór Ostico utiliza forsa hotu halo jogu maibé labele prodús golu to’o minutu jogu nian termina.

Tanba ne’e rezultadu ikus vitoria prega metin ba Aimou maske manán ho golu mihis. Maibé manán ida ne’e mak realidade jogu no derrota hela ba Ostico.

Notísia relevante:Coach Eleven ‘tebe sai’ Naimeco FC ho rezultadu 4-1 iha kopa Xanana

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!