Komunidade uma-kain 157 iha Fatu-hadan konsumu bee mota
VIQUEQUE, 19 juñu 2024 (TATOLI)- Komunidade uma-kain 157 iha aldeia Fatu-hadan, suku Uma Uain-Kraik, Postu Administrativu Viqueque Vila, Munisípiu Viqueque konsumu bee mota tanba seidauk asesu kanalizasaun bee moos.
“Tempu udan mota tuun ha’u-nia komunidade sira difisil atu asesu ba bee-moos tanba mota tun, taka fali ona bee matan sira-ne’ebé komunidade sira ke’e iha mota laran. Tan ne’e, ha’u rekomenda ba Gonvernu se bele aumenta kanalizasaun bee-moos ba aldeia Fatu-hadan hodi komunidade bele asesu bee ho di’ak”, Xefe Aldeia Fatu-hadan Rogero de Araújo Soares, hateten ba jornalista Agência Tatoli, iha postu Viqueque Vila, ohin.
Iha tinan 2023, Programa Nasionál Dezenvolvimentu Suku (PNDS) halo reabilitasaun ba bee posu haat ne’ebé maka eziste iha aldeia referidu, maibé bee posu haat la sufisiente tanba tempu bailoron naruk bee posu hirak ne’e maran, nune’e obrigado komunidade sira tenke tun ba fali mota hodi kuru bee.
Maske, nia dehan, parte saúde dala barak fó atensaun ba komunidade sira labele komsumu bee mota tanba prejudika ba saúde, maibé laiha dalan seluk ka bee posu seluk atu komunidade bele kuru hodi nesesita uma-laran.
“Maske saúde sira dehan ba ami labele komsumu bee husi mota, maibé ami bee-moos laiha entaun ami tenke ba kuru iha mota. Nune’e preokupasaun sira-ne’e ha’u hato’o ona ba autoridade munisípiu Viqueque, maibé sira dehan ba ami hein tanba sei prosesu to’o iha aldeia Fatu-hadan”, nia lamenta.
Iha fatin hanesan, Komunidade Fatu-hadan, Duarte de Araújo, reforsa tinan barak ona komunidade konsumu bee mota, maibé tempu udan boot mota tun komunidade sira pasiensia hodi hein mota maran mak foin ba kuru bee.
“Ami laiha bee-moos, nune’e ami garantia de’it ba bee mota nian. Ita la ba kuru entaun hemu saida tanba bee hanesan nesesidade importante ba ita-nia moris, ami hakarak ne’e parte relevante sira rezolve lalais ami-nia bee-moos”, nia afirma.
Hatan ba preokupasaun ne’e, Prezidente Autoridade munisípiu Viqueque (PAM), Francisco C.S de Gonzaga Soares, dehan nia parte tuun direta ba observa ona komunidade parte aldeia Fatu-dahan ne’ebé konsumu bee mota.
“Ho preokupasaun sira-ne’e ha’u tau ona periodade hodi rezolve ba bee-moos, hanesan aldeia Fatu-hadan ne’ebé komsumu ba bee-mota ida-ne’e ita sei tau ba perioridade”, Prezidente Autoridade ne’e promete.
Notisia relevante: Komunidade iha suku Uma-Uain Leten no Uma Ki’ik konsumu bee-mota
Jornalista : Vitorino Lopes da Costa
Editór : Florêncio Miranda Ximenes
