Komunidade iha suku Uma-Uain Leten no Uma Ki’ik konsumu bee-mota

VIQUEQUE, 28 marsu 2024 (TATOLI)-komunidade iha suku Uma-Uain Leten no suku Uma Ki’ik, Postu Administrativu Viqueque Vila, Munisípiu Viqueque, konsumu bee-mota durante tinan barak ona.

Abitante Uma-Uain Leten,  Miguel Gomes Alves, informa durante  tinan barak   abitante maioria kuru bee-mota hodi uza ba tein no nono hodi hemu tanba la asesu ba sistema kanalizasaun bee-moos husi Bee Timor Leste, Empreza Públika (BTL,E.P).

Notísia relevante: Abitante Uma-Ki’ik Viqueque konsumu bee mota durante tinan barak

“Husi okpasaun Indonézia to’o mai agora,ami  hotu lalin masa hala’i ba  mota hodi kuru bee-mota hodi uza ba konsumu. Maibé tempu udan no mota tun ne’e ami labele kuru tanba bee merak ka fo’er.  Ami hein mota tun hotu, maka ami ida-idak bá ke’e fali bee matan iha mota-laran hodi  kuru”,  Miguel Gomes Alves, hateten ba jornalista sira, iha suku Uma-Uain Leten, ohin.

Nune’e, nia husu ba parte kompetente sira liuliu BTL, E.P hodi rezolve sériu prokupasaun referidu, tanba bee  sai nesesidade importante ba abitante nia moris.

“Bee mota ne’e ami konsumu dala barak ami mear, maibé ami laiha dalan seluk atu hetan bee. Nune’e ha’u husu rezolve lalais”, nia sujere.

Iha fatin hanesan, Xefe Suku Uma-Uain Leten, Martinho Gusmão, rekoñese komumidade konsumu duni bee-mota, maibé ladauk rezolve, maske dala barak hato’o ona proposta ba nivél munisípiu to’o nasionál.

“Ha’u hanoin sistema dada bee-moos ne’e presiza aselera tanba ami-nia povu ida-ne’e depende ba bee-mota, tempu mota tun sira tenke konsumu fali udan been. Ita sente katak bee ne’ebé konsumu ne’e ladi’ak, tanba bele prejudika ba ita-nia saúde, maibé hakakrak ka lakohi tenke konsumu bee mota no udan been”, Autoridade ne’e sujere.

Entretantu, Xefe Suku Uma Ki’ik, Claudino Amaral, reforsa tan abitante iha suku ne’e tinan barak nian laran konsumu bee-mota.

“Tempu uluk iha fasilidade sitema bee-moos liga mai suku ne’e, maibé bee mai  ki’ik, nune’e to’o agora bee la mai. Tanba ne’e abitante sira hotu ba kee bee matan iha mota maka kuru hodi tein no hemu”. Nia akresenta.

PAM Viqueque kompromete rezolve preokupasaun referidu

Hataan ba prekopasaun ne’e, Prezidente Autoridade Munisípiu (PAM) Viqueque, Francisco Cruz Simões de Gonzaga, hateten ajusta ona ba programa hamutuk 11 no ida maka fó prioridade ba instalasaun bee-moos ba abitante ne’ebé seidauk asesu ba bee liuliu ba komunidade iha suku Uma-Uain Leten no Uma Ki’ik.

“Tempu ida ha’u ba vizita abitante suku rua ne’ebé konsumu bee-mota hodi haree direta no rona abitante sira nia preokupasaun antes ha’u foti desizasaun. Tanba ukun ha’u-nia ho kompromísiu klaru, mai atu hadi’a nune’e sei buka detallu maneiru hodi rezolve”. Prezidente ne’e promete.

Tuir dadús demografia hosi Governu Timor-Leste iha tinan 2023 katak suku Uma-Uain iha aldeia hamutuk ualu ho totál uma-ka’in 558 no totál  abitante  na’in-2.893, kompostu husi mane na’in- 1.346 no feto na’in-1.436.

Enkuatu suku Uma Ki’ik ho totál aldeia ualu, totál uma-kain 1.139, ho totál abitante na’in-3.459, kompostu husi mane na’in-1.772 no feto na’in-1.687.

Notísia relevante: PAM Francisco Cruz hakarak promove partisipasaun povu hodi dezenvolve Viqueque

Jornalista : Vitorino Lopes da Costa

Editór       : Florencio Miranda Ximenes