VIQUEQUE, 26-Marsu 2024 (TATOLI)— Francisco Cruz Ximões de Gonzaga, tersa ne’e, simu pose husi Governu liuhusi Ministériu Adminsitrasaun Estatál (MAE), sai Prezidente Autoridade Munisípiu (PAM) Viqueque, hodi substitui Januáriu Soares ‘Bolly’.
“Ha’u sei halo esforsu maka’as atu Viqueque-oan korre-an husi sikúlu konflitu liuhosi transforma pensamentu ka hahalok hirak ne’e hodi kontribui ba dezenvolvimentu nasionál espesiál ba munisípiu Viqueque,” Prezidente Autoridade munisípiu Viqueque ne’e hateten liuhosi diskursu iha tomadadepose iha Administrasaun Viqueque.
Tanba ne’e, nia dehan : “Ba ukun ida-ne’e, ha’u kompremitidu tau prioridade ba programa 11 ne’ebé nesesita poténsialidade hodi lori solusaun adekuadu no tuir realidade ne’ebé iha, hodi fortalese partisipasaun abitante, estimula inovasaun no kreatividade iha ámbitu dezenvolvimentu projetu no programa sira-ne’ebé planeia”.
Husi programa prioridade hamutuk 11 maka hanesan foku infraestutura báziku hanesan estrada munisipál to’o rurál inklui ponte hodi garante konetividade entre área urbana no área rurál, hadi’ak setór edukasaun, hadi’ak atendimentu área saúde liuliu ba labarik no inan isin rua hodi garante nutrisaun, dezenvolve setór agrikultura integradu hodi hasa’e kibi’ik agrikultór, meloria poténsia kultura no rekursu ambientál.
Alende ne’e, alarga sistema bee-moos, ligasaun eletrisidade ba abitante sira-ne’ebé seidauk asesu iha área rurál, estabelese fatin lixeiru kada postu lima, kontrola presu merkadu, konstrui terminál ba transporte públiku no negosia ba kadoras mai Beaço.
Atu atinje prioridade hira ne’e, nia kompromete ka’er metin prinsípiu ukun rasik aan hodi hadi’a no serbisu hamutuk ho espiritu nasionálizmu koletivu, dedikasaun, onestidade, responsablidade, imparsiál no taransparénsia tanba nu’udar Viqueque-oan ne’ebé simu responsavél hosi XI Governu.
“Ha’u sei nakloke ba Viqueque-oan hotu hodi servisu hamutuk hodi hala’o prosesu dezenvovimentu iha munisípiu referidu”, nia kompromete.
PAM presiza hakbesik aan ba povu
Iha biban hanesan, Vise-Ministru Administrasaun Estatál, Jacinto Rigoberto G. de Deus husu PAM atu serbí povu liuhosi promove partisipasaun ema hotu atu dezenvolve munisípiu Viqueque.
“Ohin, ha’u fó pose ba Prezidente Autoridade munisipál, sekretáriu munisiál na’in-tolu, administradór postu lima no kargu diretór munisipál na’in-18. Servisu autoridade munisípiu nian ne’ebé lidera husi Prezidente Autoridade ho ninia estrutura sira tenke hakbesik an ba ita-nia povu hodi fó atendimentu ba populasaun sira-ne’ebé bolu aparellu administrativu ka mákina poder lokál munisípiu Viqueque nian”, sujere Vise MAE ne’e.
Governu Konstituisionál dasia iha programa liuliu hodi implementa poder lokál no dezentralizasaun ne’ebé daudauk iha faze preparasaun.
“Husu hakbesik aan liután ba povu hodi permite partisipasaun sidadaun sira-nian iha prosesu foti desizaun no envolve sidadaun sira iha prosesu dezenvolvimentu ita-nia Estadu nian”, governante ne’e afirma.
Pose referidu ho bazea ba despaixu Primeiru Ministru, Xanana Gusmão ho númeru 022/PM/ III/2024, hodi nomea Prezidente Autoridade munisipál (PAM) Viqueque. Enkuantu despaisu ne’e ho bazeia ba Dekretu-Lei númeru 3/2016, 16-Marsu no Dekretu-Lei númeru 84/2023, 23 fulan-Novenbru 2023.
Prezidente Autoridade Munisípiu mak reprezenta Governu no prespetiva ba órgaun ba servisu autoridade munisípiu hodi asegura, koordena servisu administrasaun lokál, ezerse atividade servisu Estadu nian iha munisípiu.
Tuir dadús populasaun munisípiu Viqueque husi monografia 2022 iha postu lima no totál suku 36, aldeia 234, ho nia área kilometru kuadradu (Km2) 1.850. Ho totál abitante na’in-100.251.
Notísia relevante:SEP prevee rihun $50 konstrui lota peska ba peskadór iha Viqueque
Jornalista : Vitorino Lopes da Costa
Editór : Florencio Miranda Ximenes
