DILI, 19 juñu 2024 (TATOLI)-Governu liuhusi Ministériu Obras Públika (MOP) planeia atu halo dijitalizasaun ba eletrisidade iha Timor-Leste (TL) iha tinan oin.
“Sim, ida-ne’e ha’u prioridade tebes ba prosesu dijitalizasaun ne’e. Prosesu ida-ne’e importante tebetebes bainhira ita atu hasa’e kualidade emerjénsia ne’e faktór ida importante mak dijitalizasaun. Tanba dijitalizasaun ne’e mak ita atu kontrola ema dada fiu ilegál no kuandu ita-nia eletrisidade hetan problema ruma ita bele halo manutensaun ho di’ak liu,” Ministru Obras Públika Samuel Marçal hateten ba Jornalista TATOLI bainhira partisipa iha reuniaun Konselllu Ministru Palasiu Governu, kuarta ne’e.
Notísia relevante:MOP garante sei finaliza eletrifikasaun iha territóriu nasionál
Ministru ne’e dehan, husi sistema dijitalizasaun ne’e atu ajuda atu mellora di’ak liu servisu eletrisidade no oinsá fornese eletrisidade hodi ema bele asesu di’ak liután,
Governante ne’e hateten, tinan ne’e, sei loke konkursu ba estabelesimentu sub-estasaun ba eletrisidade kuandu prosesu ne’e konklui ona tinan oin sei loke konkursu hodi fó fiar ba empreza sira atu bele hahú prosesu dijitalizasaun ne’e.
“Tinan ne’e ha’u hahú ona halo tenderizasaun ba sub-estasaun, maibé tinan oin ita bele komesa ona ba prosesu dijitalizasaun,” nia afirma.
Notísia relevante:EDTL sei instala eletrisidade faze daruak ba aldeia 14 iha Baucau
Jornalista: Natalino Costa
Editór: Rafael Ximenes de A. Belo
