iklan

EKONOMIA, HEADLINE

Presiza sensibiliza komunidade hodi evita sunu rai – Floresta

Presiza sensibiliza komunidade hodi evita sunu rai – Floresta

Xefe Departamentu Protesaun Floresta no Kontrola Inséndiu, Bendito Ximenes.

DILI, 19 Juñu 2024 (TATOLI) – Departamentu Protesaun Floresta no Kontrola Inséndiu,  Ministériu Agrikultura, Pekuária, Peska no Floresta (MAPPF) husu ba komunidade sira iha territóriu atu labele sunu rai, nune’e labele hamosu inséndiu hodi afeta ba ema barak.

Xefe Departamentu Protesaun Floresta no Kontrola Inséndiu, Bendito Ximenes, esklarese katak atu evita atividade sunu rai no ai iha foho-lolon iha territóriu presiza halo sensibilizasaun ba komunidade kona-ba benefísiu husi Programa Prevensaun Inséndiu.

“Tanba husi prevensaun sira kona-ba sunu rai no ai sira ne’e maka nasaun sei livre husi poluisaun no sei la hasoru problema boot dezastre naturál bainhira udan monu rai”, xefe departamentu dehan iha Colmera, ohin.

Liuhusi programa halo sensibilizasaun ne’e maka diresaun realiza ona ba komunidade iha suku Vila Verde, postu administrativu Vera Cruz, munisípiu Dili, nune’e iha futuru labele halo atividade ilegál ne’e.

“Ita espera, iha futuru, komunidade iha Dili, liuliu iha suku Vila Verde bele iha konxiénsia atu serbisu hamutuk ho Governu hodi evita aan atu labele sunu ita-nia foho sira”,  dirijente ne’e hateten.

Nia salienta katak mundu ohin loron hasoru mudansa klimátika ne’ebé dala barak afeta ba nasaun ki’ik sira hanesan Timor-Leste. Tanba ne’e,  povu tenke hatene katak iha país ne’e, tinan ida, iha tempu bailoron no udan. “Kuandu timoroan sira la kuidadu nia ambiente, udan monu rai bele akontese dezastre natural no sei fó impaktu ba ninia rain rasik”, afirma.

Departamentu Protesaun Floresta no Kontrola inséndiu ne’e foin maka hari,  tanba ne’e seidauk iha orsamentu própriu atu aselera atividade hodi hala’o programa sensibilizasaun bá to’o iha munisípiu sira. Diresaun prevee ona verba iha planu asaun anuál 2025 montante rihun $50 atu halo programa referidu, nune’e bele hamenus atividade sunu rai.

“Iha Dili ne’e identifika atividade sunu rai ne’e barak liu iha área foho-lolon Paiól, parte Ailok-Laran, Tasi-Tolu, inklui área Hera no Metinaro”, adianta.

Rezidente aldeia 01 de Setembro, suku Vila Verde, Carlos Noronha, dehan programa divulgasaun sobre prevensaun ba inséndiu ne’e importante, tanba dala barak sira iha rai-tetuk ne’e sempre haree ahi han duut no han ai iha foho-lolon Paiól, maibé laiha ema ida maka responsabiliza ba atu ilegál sira ne’e.

Tuir nia, atividade sensibilizasaun ne’e bele enkoraja komunidade sira atu iha futuru labele sunu rai, tanba ema hotu iha nasaun ne’e iha responsabilidade atu kuidadu ninia foho sira. “Tanba inséndiu ne’e ninia impaktu maka sei hamosu poluisaun no sei estraga biodiversidade iha nasaun ne’e”, realsa.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!