iklan

HEADLINE, MUNISÍPIU, OÉ-CUSSE (RAEOA), POLÍTIKA

Autoridade selebra aniversáriu kriasaun RAEOA-ZEESM ho asaun karidade

Autoridade selebra aniversáriu kriasaun RAEOA-ZEESM ho asaun karidade

Autoridade selebra loron kriasaun RAEOA no ZEESM ho asaun karidadade iha suku Lalisuk. Imajen Tatoli/Abílio Elo Nini

OÉ-CUSSE, 19 juñu 2024 (TATOLI) – Autoridade liuhusi Asesór ba Asuntu Sosiál, Agustinho Caet, ho Asesosia Fortalesimentu Institusionál, Morga de Fátima Ote, tersa ne’e selebra loron aniversáriu kriasaun  Rejiaun Administrativa Espesiál Oé-Cusse Ambeno (RAEOA) no Zona Ekonómi Espesiál Sosiál Merkadu (ZEESM), dala-10, 18 juñu 2014-16 juñu 2024 ho asaun karidade ba komunidade sira aldeia Usapibela, suku Lalisuk, sub-rejiaun Pante Makasar.

Notísia relevante: Implementasaun ZEESM kontribui ba mudansa liña pobreza iha RAEOA

Haktuir iha Konstituisaun Repúblika Demokrátika Timor-Leste, prevista iha artigu 5 Desentralizasaun no artigu 71 Organizasaun Administrativa.

Atu implementa ártigu sira-ne’e, Governu aprova tiha ona lei númeru 3/2014, loron 17 fulan-juñu, no hetan promulgasaun husi Prezidente Repúblika kona-bá hamosu Rejiaun Administrativa Espesiál Oé-Cusse Ambeno (RAEOA) no Zona Ekonomia Espesiál Sosiál Merkadu (ZEESM).

Atu implementa lei refere Governu no Estadu hili ka hatudu no fó pose ba Mari Alkatiri hanesan Prezidente ba RAEOA no ZEESM, no mós iha tempu hanesan halo transferénsia podér no devolusaun kompeténsia atu lidera no dezenvolve Rejiaun no Zona refere hosi parte fízika hodi habelar kualidade vida moris no bein-estar komunidade Oe-Cusse Ambeno.

Nune’e dezde kriasaun lei ne’e, Governu Sentrál hahú aloka Orsamentu Jerál Estadu (OJE) dahuluk ho montante hamutuk millaun $600-resin, no konsege ezekuta ona millaun $400-resin, hodi konstrui grande mega projetu sira, liuliu ba setór infraestrutura sira, hanesan aeroportu internasionál Rota do Sândalo, ponte Noefefan, estrada pakote I no pakote II no nesesidade seluk.

Intensaun ne’e, Governu Timor-Leste hakarak atu hasai povu Oé-Cusse husi kiak no mukit tanba Oé-Cusse hanesan rai ketan, molok sai rejiaun espesiál, ne’ebé hahú hanesan distritu ida-ne’ebé ki’ak no izoladu liu, atu asesu ba kapitál nasaun Dili.

“Ohin ita mai iha ne’e selebra ejisténsia RAEOA nian, ne’ebé estabelese iha loron 18 juñu 2014, ohin kompleta ona tinan 10 iha 2024 ne’e, tan ne’e mak autoridade laiha preparasaun ne’ebé di’ak, ami husi Gabinete Prezidente Autoridade, reprezenta Prezidente Autoridade husi asesór asuntu sosiál no asesór fortalesimentu institusionál ho parte lojístika sira, mai iha ne’e, hamutuk ho komunidade sira selebra aniversáriu ne’e, ho asaun sosiál ida,” Asesór ba Asuntu Sosiál, Agustinho Caet, ko’alia ba jornalista sira iha suku Lalisuk.

Notísia relevante: PN aprova alterasaun lei kriasaun RAEOA-ZEESM iha finál globál                  

Nia informa, apoia ne’e bazea kbi’it Autoridade ba nesesidade bázika oferese ba komunidade atu hanoin hikas saida mak akontese iha tinan 10 nia laran, liga ho dezenvolvimentu iha RAEOA, hatudu mudánsa pozitiva infraestrutura.

“Ita observa dezenvolvimentu la’o, ita espera katak saida mak seidauk la’o másimu, bele kontinua la’o liu-liu iha mandate tinan lima ida-ne’e, ita ejize dezenvolvimentu ne’e tenki to’o área remora rurál, nune’e komunidade sira senti katak, goza estatutu espesiál ne’e diferenti ho munisipíu seluk,” nia hateten.

Komunidade Juliano Martins Tefa, espera ho ejisténsia estatututu RAEOA ba oin kontinua aselera dezenvolvimentu ba nivél suku.

“Asaun konkretu ne’ebé autoridade halo iha loron ida ohin, ami agradese tanba liuhusi apoia sosiál ne’e nu’udar simbolu ida atu selebra loron aiversáriu ba estatutu RAEOA nian, husi 2014 to’o 2024 ne’e, espera kontinua aselera dezenvolvimentu ba nivél suku, liu-liu estrada rurál sira, bee-moos no seluk-tán,” nia espera.

Komunidade Carolina Falo, agradese tanba apoia nesesidade bázika hirak-ne’e bele sustenta ona nesesidade família.

“Ami agradese, tanba imi  bele mai tau matan mai ami, tanba ita ukun an ona, ami mós kontenti tanba Governu mós la taka matan mai ami, atu oferese apoi oi-oin liu-liu ba ai-han no nesesidade bázika, ami husu de’it kontinua serbisu lori ita-nia rai ba oin,” nia agradese.

Notísia relevante:Konsellu Ministru altera lei kriasaun RAEOA no ZEESM

Entretantu, mandatu dahuluk lidera RAEOA husi Mari Alkatiri, mandatu daruak lidera husi José Luis Guteres, mandatu datoluk lidera husi Arsénio Paixão Bano no daudaun ne’e lidera husi Rogério Tiago Lobato.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!