BOBONARO, 19 juñu 2024 (TATOLI) – Prezidente Komisaun Nasionál Eleisaun (CNE, sigla portugues), José Belo Pereira, kuarta ne’e lansa programa edukasaun sívika nível nasionál ne’ebé realiza iha suku Leohitu, postu administrativu Balibó, munisípiu Bobonaro ho tema “Hamutuk konsolida demokrasia no eleisaun ba podér lokál partisipativu no inkluzivu.”
Programa edukasaun sívika ne’e hanesan faze preparasaun atu hasoru eleisaun kámara munisipál no eleisaun suku sira-ne’ebé sei akontese ba suku foun balu.
Prezidente CNE esplika, edukasaun sívika ne’e sensibiliza kona-ba lei no lala’ok eleisaun kámara munisipál nune’e komunidade sira iha koñesimentu partisipa, hodi garante eleisaun ne’e bele la’o ho kualidade, rasionál no responsabilidade.
“Sira hili ema karik, hili ho di’ak, hili ema ho rasionál, tanba eleisaun ba prezidente kámara munisipál ne’e la mai husi munisípiu de’it, bele mós husi individu, sira bele la konkorda ho kandidatu partidu nian, ita bele hili ema ida, ne’e nakloke, deputadu sira-ne’ebé mai husi partidu,” Prezidente CNE José Belo, ko’alia iha Leohitu.
Diretor Nasionál Dezenvolvimentu Igualdade Jéneru, José de Jesus Carvalho, reforsa SEI hola parte iha programa ne’e oinsá atu hakbi’it partisipasaun feto iha eleisaun kámara munisipál.
Atu atinje ida ne’e SEI mós sei halo edukasaun sívika ba estudante sira iha eskola sira no iha fulan-agustu tinan ne’e sei realiza mós programa kongresu asaun feto iha munisípiu 13.
“Agora daudaun ami identifika sira-nia proposta sira, iha fulan-agustu realiza ona programa kongresu asaun feto nível munisípiu sira hotu, SEI tau osan kada munisípiu $5000 atu realiza no hafoun fila-fali estrutura nível munisípiu ho nia objetivu atu identifika feto potensiál iha munisípiu sira,” nia katak.
Sekretáriu Autoridade Munisipál Bobonaro ba Asuntu Sosiál, Júlio Carvalho Caero, konsidera programa ne’e importante tanba durante ne’e partisipasaun komunidade iha eleisaun sira liubá sei menus kompara ho lista eleitór.
“Ita hakarak totál votante ne’e 1.000, labele mai 200 de’it, ne’e ema dehan la halo. Ida-ne’e mak agora ita tenke ser prepara, rona mai, intervsaun polítika sei tama oinoin, maibé fila fali ba ita, hakarak lori Bobonaro ne’e ba oin, partidu sé no idividu sei mak organiza ita ba de’it, ita rona hotu programa ita haree, ida-ne’ebé mak di’ak,” nia katak.
Notísia relevante: PDHJ konsidera STAE-CNE Bobonaro serbisu ho imparsiál
Jornalista: Sérgio da Cruz
Editór: Evaristo Soares Martins
