iklan

COVALIMA, HEADLINE

Guarda florestál Covalima halo apreensaun ba kilat anin tolu

Guarda florestál Covalima halo apreensaun ba kilat anin tolu

Xefe Departamentu Reflorestasaun Territóriál, Floresta no Planta Industriál Covalima, Domingos Gusmão. Foto/Celestina Teles.

COVALIMA, 20 Juñu 2024 (TATOLI) – Guarda florestál Covalima halo apreensaun ba kilat anin tolu husi grupu kasadór sira ne’ebé halo atividade kasa ba balada protejidu sira.

Xefe Departamentu Reflorestasaun Territóriál, Floresta no Planta Industriál Covalima, Domingos Gusmão, hateten guarda sira foti kilat anin tolu bainhira halo patrullamentu iha ai-laran tuan sira ne’e mak hetan komunidade balun kasa animál fuik.

“Durante fulan lima ami halo patrullamentu konsege kaptura grupu kasa niki, meda no seluk tan. Nune’e, ami halo apreensaun ba kilat anin tolu atu sira labele kasa animál iha ai-laran”, Domingos Gusmão dehan iha Kampung Baru, ohin.

Grupu kasadór ne’ebé guarda florestál sira kaptura mai husi postu administrativu Tilomar, Fohorem no Maucatar, nune’e Floresta Covalima prepara ona relatóriu atu entrega ba Diresaun Nasionál atu halo prosesu.

Dirijente ne’e salienta katak guarda florestál sira halo apreensaun ba kilat anin, tanba lei arma branka númeru 5/2017 bandu labele uza kilat anin no floresta mós, antes ne’e, halo ona sensibilizasaun regra floresta kona-ba kasa animál fuik, tesi ai arbiru no nia impaktu ba komunidade.

Abitante João Ferreira husu ba guarda florestál sira presiza atu serbisu maka’as hodi halo kontrolu ba ai-laran tuan sira, liuliu iha postu administrativu sira, tanba animál fuik hanesan, niki meda no seluk tan hahú lakon ona.

“Durante ne’e Floresta Covalima mós halo sosializasaun kona-ba regra floresta, maibé komunidade nafatin laiha konxiénsia, nune’e iha tempu kalan grupu sira kontinua kasa animál fuik ne’ebé Estadu bandu”, nia reforsa.

Notísia relevante: Guarda florestál kaptura abitante ida tesi ilegalmente ai-bubur

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!