iklan

HEADLINE, POLÍTIKA

PR Horta-PM Xanana diskute preparasaun TL nia adezaun ba ASEAN

PR Horta-PM Xanana diskute preparasaun TL nia adezaun ba ASEAN

Prezidente Repúblika, Jose Ramos-Horta selebra aniversariu ba Primeiru-Ministru, Kay Rala Xanana Gusmão. iha Palásiu Prezidensiál, Bairru-Pité, kinta (20/06). Imajen Tatoli/Egas Cristóvão

DILI, 20 juñu 2024 (TATOLI)– Prezidente Repúblika (PR), José Ramos Horta, kinta ne’e, iha Palásiu Prezidensiál-Dili,  hasoru malu ho Primeiru-Ministru (PM), Kay Rala Xanana Gusmão, ko’alia liu kona-ba preparasaun Timor-Leste nian ne’ebé sei adere ba membru permanente ASEAN iha tinan oin.

“Ami ko’alia liu ba ita nia preparasaun oinsá atu adere ba ASEAN, Maun Xanana ami na’in rua nia objetivu besik tinan ida ona, ami na’in-rua hakarak ita tenke tama ona hanesan membru ASEAN iha tinan 2025,” Xefe Estadu hateten ba jornalista sira.

Tanba ne’e, Governu tenke halo formalizasaun ho karta ba sekretariadu ASEAN  ho lider hotu kona-ba Timor-Leste atu tama ba membru permanente iha tinan 2025.

“Ha’u hanoin ASEAN konkorda ita atu tama iha tinan oin, maibé ita mak tenke halo formalizasaun ho karta kona-ba ita nia adezaun iha 2025,” nia tenik.

Alende ne’e, Primeiru-Ministru ho Prezidente Repúblika diskute mós kona-ba situasaun ekonomia nasionál no mundiál, liuliu sasan folin sa’e.

“Ami ko’alia mós kona-ba ekonomia nasionál no mundiál, sasan ne’ebé folin sa’e, oinsa mak Governu bele halo intervensaun ruma ba kestaun ne’e. Ami ko’alia Governu sei haree oinsa rezolve kestaun balu,” PR Horta katak.

Iha okaziaun ne’e, Primeiru-Ministru aprezenta mós relatóriu servisu ne’ebé foin lalais Xefe Governu partisipa iha forum mundiál ba pás iha Ukrania ne’ebé realiza iha Jeneva.

“Iha forum ne’e Primeiru-Ministru hato’o nia intervensaun kapas tebes, tanba nia hatudu dalan ba dame, la’os de’it ko’alia kona-ba apoiu kilat militar ba Ukrania, maibé ko’alia se ita apoiu de’it ba Ukrania funu sei la hotu, maibé nia ko’alia liu kona-ba dame, maske fó impaktu lubuk ida ba ema nia hanoin, maibé tenke buka duni dalan oinsa kria dame,” Horta hateten.

Iha sorin seluk Xefe Governu hateten, hasoru Prezidente Repúblika hato’o de’it relatóriu servisu iha rai-li’ur ba Xefe Estadu no asuntu importante balun.

“Ita hatene ona, foin lais ha’u ba iha Jeneva iha forum mundiál kona-ba pás ba Ukrania, no asuntu seluk balun tan, ida ne’e mak ohin ha’u hasoru Prezidente Repúblika,” PM Xanana tenik.

Notisia relevante: PR rekomenda IX Governu fó prioridade TL adere ba ASEAN

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!