iklan

EDUKASAUN, HEADLINE

UNITAL foku ba dezenvolvimentu universidade

UNITAL foku ba dezenvolvimentu universidade

Logotipu UNITAL. Imajen/Espesiál

DILI, 20 juñu 2024 (TATOLI)—Universidade Orientál Timor-Lorosa’e (UNITAL) sei utiliza subvensaun públika husi Ministériu Ensinu Superiór, Siénsia no Kultura (MESSK) hodi dezenvolve universidade.

“Obrigada ba Governu liu-liu MESSK ne’ebé hanoin hetan nafatin ami no fó apoiu ona ami. Ami promete ho apoiu hirak ne’e ami sei utiliza didi’ak ho transparánsia atubele dezenvolve di’ak liután universidade ne’e,” Reitór UNITAL, Joaquim de Jesus Vas, hateten iha ninia knaar fatin, Becora, kinta ne’e.

MESSK atribui subvensaun millaun $5 fazeadamente ba kada universidade, nune’e bainhira aprezenta relatóriu ho nia progresu mak foin fó kompletu.

“Tinan ne’e UNITAL hetan rihun $300-resin, ita seidauk hetan kompletu millaun $5 ne’e tanba iha faze dahuluk ne’e ita hetan uluk metade ba programa saida mak kada universidade halo, depois aprezenta fali relatóriu no programa ninia progresu hafoin hetan kompletu. Nune’e, UNITAL deside subvensaun públika iha faze dahuluk ne’e aloka ba Fakuldade Agrikultura hodi halo viveiru no ba Fakuldade Saúde hodi halo manu luhan no bibi Luhan,” Reitór akresenta.

Notísia relevante : UNITAL sei kapasita rekursu umanu ba implementasaun Lei Baze Ensinu Superiór

Bainhira hetan ona orsamentu, parte universidade sei kompleta ekipamentu laboratóriu infermajen, análiza laboratóriu saúde públika no nutrisaun, hafoin laboratóriu iha Fakuldade Enjeñaria mós iha departamentu téknika inklui aloka mós ba jornál no publikasaun.

“Ita sei aloka hasa’e nível koñesimentu língua iha universidade tanba ida-ne’e ho nia objetivu mak bele dezenvolve rekursu umanu kualidade hodi bele apoiu ba dezenvolvimentu nasionál iha rai doben Timor-Leste,” nia tenik.

Planu hirak ne’e mak aprezenta ona ba MESSK no ekipa husi UNITAL preparadu hodi implementa. Sira sei nafatin koordena ho MESSK nune’e nia ezekusaun ne’e nafatin.

Reitór Institutu Siénsia Saúde (ICS, sigla portugés), Leão Borges, hateten, parte institutu prontu no iha responsabilidade tomak ba apoiu subvensaun públika husi Governu ne’e hodi eleva kualidade edukasaun iha institutu rasik.

“Ba oin ami sei submete ami-nia planu ba atividade sira, primeira faze 40%, depois ezekuta 40% temque ser hatama relatóriu, hafoin mak sira fó tan 60 %, agora ami preparadu ba planu ezekusaun depois ba oin ita sei haree, orsamentu subvensaun públika ida-ne’e ami ho responsabilidade tomak atubele hadi’a ami-nia instituisaun, liu-liu hadi’a kualidade,” nia reforsa.

Reitór dehan, iha tipu apoiu oin-oin, ida mak oinsá bele hasa’e kualidade iha lian portugés no fó formasaun ba dosente sira, liu-liu ko’alia kona-ba pedagójika, signifika métodu ida-ne’ebé dosente sira la’o tuir hodi hanorin estudante sira ho di’ak, nune’e estudante sira mós akapta saida mak dosente sira fó.

Iha apoiu ne’e mós ICS sei fó subsídiu ba estudante sira-ne’ebé mak iha prestasaun di’ak. Kona-ba minimiza prospina estudante sira-nia ne’e, desizaun husi fundasaun sira, maibé sira sei propoin mós ba fundasaun atu haree asuntu ne’e iha apoiu subvensaun nia ne’e.

Ministru Ensinu Superior Siénsia no Kultura, José Honório Jerónimo, informa, apoiu subvensaun públika ba universidade privadu 17 ne’e hodi fasilita sira-nia atividade iha universidade atu eleva kualidade edukasaun iha Timor-Leste no osan ne’e povu nune’e husu ba kada ensinu superiór sira ne’ebé hetan tenke iha responsabilidade atu ezekuta ho didi’ak ba programa hotu.

“Apoiu subvensaun públika ne’e atu sira bele utiliza ba atividade iha universidade. Ita fó apoiu signifika sira mós tenke fó buat ruma ba ita ho kualidade. Osan ne’e povu nia nune’e sira hotu iha direitu ba subvensaun ne’e. Tanba ne’e husu atu utiliza didi’ak. Faze dahuluk ne’e ita transfere uluk 40%, depois ita iha ekipa tékniku sira-ne’ebé sei ba tuir atu haree sira-nia prosesu ba ezekusaun subvensaun, hafoin ita haree progresu mak ita foin bele transfere tan 60% ba sira,” nia informa.

Iha atribuisaun ne’e la hanesan, ba ensinu superiór 15 hetan rihun $300 no iha ensinu superior rua, Institu naroman esperansa ho universidade Katólika Timorense hetan rihun $200-resin, tanba ensinu superiór rua ne’e foin mak hetan lisensa maibé seidauk iha avaliasaun.

“Iha orsamentu 2025 ne’e Governu atribui millaun $5 ba ensinu superiór privadu sira hotu, nune’e ensinu superiór privadu 17 ne’e mak ita apoiu ona. Iha akordu ne’e iha pontu importante balun ne’ebé mak ensinu superior presiza kumpre, karik ezekusaun orsamentu ne’e mak sira la ezekuta tuir akordu sei hetan sansaun husi Governu,” Ministru fó sai.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!