DILI, 20 juñu 2024 (TATOLI)—Universidade Oriental Timor-Lorosa’e (UNITAL) sei kapasita rekursu umanu nu’udar preparasaun ba implementasaun Lei Baze Ensinu Superiór.
“Ami sei halo prosesu preparasaun kapasita nia rekursu umanu hodi oinsá implementa lei ne’e. Agora ein termu rekursu umanu, ami prontu ona tanba ami-nia ema balun ba eskola ona. Aleinde ne’e UNITAL asina akordu ho universidade balun hosi rai-li’ur hodi fasilita formasaun,” Reitór UNITAL, Joaquim de Jesus Vás, hateten ba Agência Tatoli, iha ninia knaar fatin Becora, kinta ne’e.
Nia konsidera lei ne’e importante no hanesan kritériu ida hodi regula Institutu Ensinu Superiór sira iha Timor-Leste.
“Entaun, iha IX Governu konstituisionál liuhusi Ministériu Ensinu Superiór, Siénsia no Kultura (MESSK) nia polítika no planu, halo diskusaun no aprova ona iha Parlamentu Nasionál Nasionál, nune’e Lei Baze Ensinu Superiór tau iha padraun no sai kritériu hodi regula Institutu Ensinu Superiór sira iha Timor-Leste,” Reitór akresenta.
Notísia relevante : Lei Baze Ensinu Superiór nu’udar lei dahuluk atu regula IES
Komisaun G ne’ebé trata asuntu Edukasaun, Juventude, Kultura no Sidadania iha Parlamentu Nasionál (PN) foin lalais ne’e finaliza diskusaun proposta-lei númeru 5VI (1a)-Lei Baze Ensinu Superiór iha faze espesializada.
“Entaun, ami ho deputadu Komisaun G, inklui Reitór sira inklui no Ministru Ensinu Superiór, Siénsia no Kultura ko’alia kona-ba lei Baze Ensinu Superiór. Iha ne’ebá iha artigu balun ne’ebé foka liubá língua, ne’ebé implementa mak língua ofisiál portugés no tetun apoiante. Tanba ne’e mak atu peskiza siénsia importante língua portugés tenke hatene. Lei Baze Ensinu Superiór fó dalan no fó oportunidade ensinu privada sira ne’ebé liga liu ba jestaun administrativu,” nia akresenta.
Reitór ne’e dehan, laiha lei ida mak Reitór universidade ida tenke S1,S2, S3, profesór no doutor, ida-ne’e laiha.
“Tanba ne’e mak ita espera katak bele implementa. Lei Baze Ensinu Superiór nia di’ak mak uluk Lei Ensinu Báziku no Lei Ensinu Superiór hamutuk de’it,” nia tenik.
UNITAL iha estudante hamutuk 5.957 ho fakuldade hitu mak hanesan Fakuldade Direitu, Edukasaun, Fakuldade Siénsia no Polítika, Fakuldade ekonómia, Fakuldade enjenária, Fakuldade Siénsia Saúde, no Fakuldade Agrikultura.
Jornalista : Osória Marques
Editora : Julia Chatarina
