iklan

EDUKASAUN, HEADLINE

Lei Baze Ensinu Superiór nu’udar lei dahuluk atu regula IES

Lei Baze Ensinu Superiór nu’udar lei dahuluk atu regula IES

Ministru Ensinu Superiór, Siénsia no Kultura José Honório Jerónimo. Imajen Tatoli/Francisco Sony

DILI, 18 juñu 2024 (TATOLI)– Ministru Ensinu Superiór Siénsia no Kultura (MESSK), José Honório Jerónimo, husu atu Institutu Ensinu Superiór (IES) atu kumpre Lei Baze Ensinu Superiór.

Lejizlasaun ne’e halo ona diskusaun iha faze espesialidade iha munisípiu Liquiçá durante loron-tolu, ne’ebé daudaun tama ona ba komisaun G. Loron 24 juñu agora sei halo diskusaun iha faze finál globál iha Parlamentu Nasionál.

“Kuandu aprova tiha finál globál, ha’u sei asina, Primeiru-Ministru sei asina, Prezidente Parlamentu Nasionál mós sei asina, depois haruka ba Prezidente Repúblika atu promulga, ne’ebé lei ne’e sei sai hanesan lei baze primeiru ba ensinu superiór iha Timor-Leste atubele regulariza ita-nia universidade sira. Iha reitór balun tau kestaun ba língua maibé Governu nafatin la’o. Bainhira Prezidente Repúblika promulga, hakarak ka lakohi ensinu superiór sira tenke kumpre tanba ne’e Lei Baze Ensinu Superiór nian,” Ministru José Honório informa hafoin asina akordu tékniku entre MESSK no International Cultural Communication Center Malaysia (ICCCM), iha salaun MESSK, tersa ne’e.

Notísia relevante : Komisaun G finaliza diskusaun proposta-lei Baze Ensinu Superiór iha faze espesialidade

Governante ne’e dehan, lian instrusaun rua de’it mak hanesan tetun no portugés.

“Ita tenke hanoin katak portugés la’ós malae sira-nian maibé timoroan sira-nia no timoroan sira mak tenke promove portugés atu sai lian ida-ne’ebé timoroan hotu-hotu tenke ko’alia. Labele dehan portugés ne’e malae nia tanba portugés ne’e tau iha Konstituisaun, timoroan iha obrigasaun atu apreende lian ida-ne’e. Ita tenke marka diferensa duni iha ASEAN, bainhira ita tama ho portugés diferente ho nasaun sira seluk,” nia akresenta.

Parte Governu iha mós hanoin atu dezenvolve lian tetun di’ak liután maibé presiza rekursu no tempu naruk.

“Iha tempu oin mai ita presiza halo kongresu lian tétun atu nune’e ita armoniza tiha ita-nia lian tetun sai padraun nasionál ida atu timoroan hotu bele uza ho di’ak. Ita bele ko’alia inglés maibé ne’e língua internasionál timoroan hotu-hotu bele ko’alia,” Ministru tenik.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!