Administradór Uatulari husu Xefe Sentru Saúde foun servisu ho fuan
VIQUEQUE, 21 juñu 2024 (TATOLI)- Administradór Postu Administrativu Uatulari, Munisípiu Viqueque, Jorge Soares, husu Xefe Sentru Saúde foun, Noe Amaral, hodi servisu másimu ho responsavel no ho domin tomak fó atendimentu ba komunidade iha postu administrativu Uatulari.
Doutór Noe Amaral simu kna’ar hodi asume kargu Xefe Sentru Saúde Uatulari hodi troka Valente Soares da Silva.
“Ha’u husu Xefe Sentru Saúde foun servisu ho responsabilidade, pontualidade no disiplina inklui ho domin hodi fó atendimentu ba komunidade sira iha Uatulari. Tanba foin lalais ha’u simu informasaun husi pasiente sira katak, ita-nia servisu ladun másimu”,Jorge Soares, hateten iha serimónia entrega pose ba Xefe Sentru Saúde Uatulari foun, iha sentru saúde Uatulari, ohin.
Autoridade Uatulari ne’e mós agradese ba Xefe Sentru Saúde sesante Valenti ne’ebé durante ne’e asume kna’ar durante tinan 15 hodi servi povu Uatulari. Nune’e husu nafatin koopera malu hodi lori setór saúde Uatulari la’o di’ak atu garante komunidade sira moris ho saudavel.
Iha fatin hanesan, Diretór Servisu Saúde Munisípiu Viqueque, Aljacsono S. Maia, haktuir, kona-ba mudansa kna’ar ne’e la’ós buat foun, maibé hanesan Uatulari oan nafatin kolabora hamutuk no pesoal saúde kuda fraternidade umana hodi trata ema ho fuan.
“Ita nafatin atende ema ho fuan tanba ita-nia profisaun ne’e ita tenke valoriza hodi servi ba povu Uatulari. Nune’e povu kontinua fó konfiansa ba ita, rekomenda ba Xefe atuál labele hanoin ida-ne’e oportunidade, maibé ida-ne’e sai hanesan responsavél boot”, nia enkoraja.
Kompromete servisu hamutuk hodi servi povu Uatulari
Iha biban ne’e, Xefe Sentru Saúde Uatulari sesante, Valente Soares da Silva, kompromete kontinua servisu hamutuk lideansa foun hodi fó atendementu ba komunidade Uatulari.
“Ha’u sei apoiu tomak xefe foun hodi lori servisu saúde Uatulari, hadi’a kualidade servisu atendimentu ba ita-nia komunidade sira”, nia kompromete.
Entretantu, Xefe Sentru Saúde Uatulari foun, Noe Amaral, hato’o agradese ba pesoal saúde sira ne’ebé durante ne’e servisu iha sentru saúde Uatulari no husu atu kontinua servisu hamutuk hodi servi povu.
“Konfiasa ne’ebé ha’u hetan sei implementa lei no regra sira-ne’ebé iha, ha’u sei la kria regulamentu foun ruma hodi regula pesoal saúde sira. Nune’e husu ba pesoal saúde sira kumpre nafatin regra, no husu ita atu kolabora hamutuk hodi lori saúde Uatulari ba oin. Ha’u sei simu hanoin konstrutivu sira husi autoridade no komunidade sira hodi lori atendementu ba ita-nia komunidade sira iha baze ho di’ak”, nia promete.
Tuir dadús pesoal saúde servisu sentru saúde Uatulari kompostu husi mediku (doutór), enfermeiru sira, tekniku aliadu no pesoal saúde volutáriu na’in-113, ne’ebé servisu iha sentru saúde Uatulari no destaka iha postu saúde 12 ne’ebé establese iha suku neen. Ho totál populasaun hamutuk na’in-2.635.
Notisia relevante:Sentru Saúde Uatulari enfreta menus estoke ai-moruk ba pasiente mear no kanek
Jornalista : Vitorino Lopes da Costa
Editór : Florencio Miranda Ximenes
