DILI, 21 juñu 2024 (TATOLI)—Autoridade Munisípiu Dili (AMD) daudaun ne’e rejista ona família ne’ebé halo rate iha dalan Kapela Pai Nosso, Semitériu Santa Cruz nia kotuk to’o Sebastião Gomes nia rate atu hamamuk fatin.
“Kona-ba konstrusaun Memoriál 12 novembru, ami mós hasai ona avizu atu komunidade ne’ebé halo rate iha dalan atu ba Matebian Sebatião Gomes nia rate ne’e, agora família besik 50 ona mak rejista, atu mai tuur hamutuk buka dalan ba restu mortál sira tau iha osuáriu nune’e dalan sira ne’e nakloke atu ita hotu bele asesu. Maibé ita sei tuur hamutuk ho Komité 12 novembru, Terra no Proporiedade, no Ministériu Obra Públika (MOP) hori fó desizaun ne’e ba família sira,” Prezidente Autoridade munisípiu Dili, Gregório Saldanha, informa, iha Tasi-Tolu, sesta ne’e.
Iha sorin seluk, daudaun ne’e Ministériu Asuntu Kombantente Libertasaun Nasionál (MAKLN), MOP, Ajénsia Dezenvolvimentu Nasionál (ADN), inklui Komité 12 Novembru halo ona diskusaun atu haruka tékniku sira ba Portugal hodi haree empreza ne’ebé bele prodús estátua.
“Ita seidauk bele deside bainhira mak bá tanba sei prepara orsamentu hotu mak bá maibé lais di’ak liu,” Gregório akresenta.
Notísia relevante : Empreza responsável konstrusaun Memoriál 12 Novembru hein desizaun liberta espasu
Antes ne’e, empreza responsável konstrusaun Memoriál 12 Novembru, hein hela desizaun husi Governu atu liberta espasu balun iha rate Santa Cruz hodi bele kontinua konstrusaun.
“Finaliza tarde ne’e la’ós ami-nia sala, maibé dono do projeto ho Komité 12 Novembru, ami hein de’it desizaun hodi halo serbisu. Maski ami maná konkursu ba konstrusaun Memoriál 12 Novembru ne’e, maibé ami atu halo serbisu hein orden bainhira dehan atu sobu rate, to’o agora seidauk iha desizaun, ami hein de’it mak estátua hodi monta no sobu rate. Agora sobu rate ne’e ami hein to’o tinan-tolu ona maibé seidauk iha desizaun. Kona-ba estátua, ami halo hotu ona tau estátua fatin mak iha oin kedas, ne’ebé sei tau palaka ba ne’e,” Diretór empreza Bobolait, Lda, Carlito Pereira, hateten.
Orsamentu ne’ebé aloka ba konstrusaun Monumentu Santa Cruz ka Memoriál 12 Novembru ne’e hamutuk $1.385.389,88.
Hahú konstrusaun iha loron 22 setembru 2021 to’o tuir planu finaliza iha loron 22 setembru 2022 maibé seidauk konklui, nune’e Governu liuhusi MAKLN prolonga to’o tinan 2023 maibé seidauk hetan konkluzaun nafatin.
Iha loron 13 juñu 2023, Komisaun Antí-Korrupsaun (CAC, sigla portugés) fó sai rezultadu inspesaun ba projetu ida-ne’e, ne’ebé identifika katak tuir kontratu projetu ida-ne’e halo ona estensaun kontratu ba fulan-neen, maibé projetu fíziku foin atinje to’o 17,65%.
CAC mós identifika iha lakuna balun mak akontese relasiona ho dokumentu dezeñu nian.
Jornalista : Arminda Fonseca
Editora : Julia Chatarina
