Autoridade oferese rai ba UPM destaka postu vijilánsia iha Sakato-Citrana
OÉ-CUSSE, 20 juñu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhusi Sekretáriu Rejionál ba Asuntu Terra Propriedade, kinta ne’e oferese rai ektare ida-resin ba Polísia Nasionál Timor-Leste (PNTL) liuhusi Unidade Polísia Marítima (UPM) hodi destaka postu vijilánsia iha fronteira marítima Sakato, sub-rejiaun Pante Makasar no fronteira marítima Citrana sub-rejiaun Nítibe.
“Rai ektare ida-resin ne’e iha rua, ida lokaliza iha fronteira Sakato, suku Nípani, no ida lokaliza iha suku Bene-Ufe Citrana, atu utiliza konstrui postu UPM, bele tau matan ba fronteira marítima Oé-Cusse nian, liuliu peska ilegál kontra bandu no seluk-tán,” Sekretáriu Rejionál ba Asuntu Terra Propriedade, Marcelino Marques Coro, ko’alia iha Oé-Cusse.
Dirijente Terra Propriedade ne’e, espera ho rai ne’ebé Autoridade entrega ba UPM, bele utiliza ba nesesidade tuir objetivu no misaun Estadu nian atu kontrola marítima iha territóriu Oé-Cusse.
Notísia relevante: Deputadu Komisaun B husu Governu reforsa ekipamentu UPM kombate peska ilegál
Komandante Unidade Polísia Marítima, Superintendente Polísia, Eugénio Pereira, reprezenta komandu PNTL agradese, tanba bele responde ona hodi kondisiona postu vijilánsia no halo kontrolu ba iha zona marítima RAEOA nian.
UPM iha nia planu atu halo destakamentu postu vizilánsia no kondisaun ba zona marítima iha RAEOA, tanba daudaun ne’e fronteira marítima identifikadu ona iha parte rua, Sakato no Citrana.
“Konforme lei orgánika PNTL atribui pozisaun ba UPM atu kontrola atividade ilísitu sira, hanesan tráfiku umanu, kazu kontra-bandu no peska ilegál,” nia akresenta.
Situasaun sira-ne’e, kompeténsia ba iha UPM atu ezerse nia responsabilidade tuir, tan ne’e ho apoia ne’e fó kondisaun atubele kondisiona UPM nia atividade tomak hodi kontrola zona marítima.
Notísia relevante: Autoridade oferese jardín Oébau ba Komponente Navál atu proteje rikusoin tasi
Rekorda fali katak, iha fulan maiu 2024 ne’e, serbisu Terra Propriedade RAEOA oferese mós rai ektare ida-resin iha jardín Oébau, ba FALINTIL-Forsa Defeza Timor-Leste (F-FDTL) hodi konstrui edifísiu Komponente Navál nian atu proteje rikusoin iha tasi hodi kontrola atividade peska ilegál iha territóriu Oé-Cusse.
Jornalista: Abílio Elo Nini
Editór: Evaristo Soares Martins
