iklan

NASIONÁL, EKONOMIA, INTERNASIONÁL, DILI, HEADLINE

EUA-Japaun no Korea Súl apoiu másimu TL nia adezaun ba ASEAN

EUA-Japaun no Korea Súl apoiu másimu TL nia adezaun ba ASEAN

Imajen/media PR

DILI, 21 juñu 2024 (TATOL) – Embaixadór tolu husi nasaun Estadu Unidu Amerika (EUA), Japaun no Korea Súl ne’ebé durante ne’e hala’o misaun diplomata iha ASEAN apoia másimu Timor-Leste nia adezaun ba membru permanente iha 2025.

Deklaransaun ne’e hato’o husi Embaxadór EUA bá ASEAN, Yohannes A. Abraham hamutuk ho   Embaixadór Repúblika Korea bá ASEAN, Lee Jang-Keun no  Embaixadór Japaun bá ASEAN, Kiya Masahiko bainhira hasoru malu ho Prezidente Repúblika, José Ramos Horta, iha Palásiu Prezidensiál, Dili, sesta ne’e.

Prezidente Repúblika, Jose Ramos-Horta, Enkontro ho Embaixadór Amérika no ASEAN, Sr. Yohannes Abraham. iha Palásiu Prezidensiál, Bairru-Pité, kinta (20/06). Imajen Tatoli/Egas Cristóvão

Hafoin enkontru, Embaixadór EUA ba ASEAN Abraham,  hateten, sentidu apoia ne’ebé nasaun tolu ne’e fó bá Timor-Leste importante tebes tanba bainhira integra ona hanesan membru permanente bá ASEAN, sei hetan benefísiu barak iha aspeitu oioin.

“Ami mai ko’alia ho Prezidente Repúblika kona-ba relasaun bilaterál, liuliu Timor-Leste nia adezaun ba ASEAN no ami hato’o ba Prezidente kona-ba ami nia apoiu másimu ba Timor-Leste nia adezaun ba ASEAN hanesan membru permanente iha tinan oin, ami nasaun tolu apoiu tebes,” Embaixadór Abraham hatete ba jornalista sira bainhira ramata somutuk ho Xefe Estadu.

Diplomata EUA ne’e dehan tan, nasaun tolu prontu apoiu Timor-Leste iha área saida de’it ne’ebé presiza durante adezaun.

“Ami buka nafatin no identifika oportunidade ne’ebé Timor-Leste presiza, ami haree ona liuliu iha área kapasitasaun rekursu umanu, dezenvolvimentu infrastrutura, formasaun iha área edukasaun nian,” katak.

Apoiu husi nasaun tolu ne’e, la haree bá dezafiu ne’ebé Timor-Leste sei hasoru bainhira sai ona membru permanente ASEAN, maibé haree liu bá oportunidade ne’ebé Timor-Leste tenke hetan liu-hosi ninia estatutu loloos hanesan membru ASEAN.

Iha progresu pozitivu TL sai membru ASEAN

Prezidente Repúblika, José Ramos-Horta hasoru malu ho Vise-Ministra ba Asuntu ASEAN, Milena Maria da Costa Rangel, hodi halo revizaun ba Timor-Leste nia progresu iha adezaun ba ASEAN. Diskusaun ne’e ko’alia liu kona-ba dezenvolvimentu pozitivu sira husi sorumutu koordenasaun ASEAN nian foin lalais ne’e, ne’ebé hatudu progresu nasaun nian ne’ebé la’o dada’uk hodi kumpre kritériu sai membru ASEAN nian.

Prezidente Repúblika, Jose Ramos-Horta enkontro ho Vise-MNEK Assuntu ASEAN, Milena Maria da Costa Rangel, iha Palásiu Prezidensiál.iha Palásiu Prezidensiál, Bairru-Pité, kinta (20/06). Imajen Tatoli/Egas Cristóvão

Prezidente Horta apresia esforsu governu nian no enkoraja atu kontinua serbisu maka’as ho kolaborasaun entre Ministru relevante sira hodi kumpre rekizitu sira ne’ebé presiza iha tinan 2025. Nia ko’alia liu kona-ba importánsia atu hetan membru ASEAN tomak hodi hasa’e kooperasaun no integrasaun rejionál.

Vise-Ministra Rangel hateten katak nia hetan ona susesu signifikativu iha konkursu atu sai membru, hanesan estabelesimentu relasaun diplomátika ho nasaun ASEAN sira no kumpre rekizitu administrativu oioin.

Nia hateten katak dezenvolvimentu infraestrutura importante la’ós de’it ba adezaun ba ASEAN maibé mós ba dezenvolvimentu nasaun nian ne’ebé di’ak liu.

Sorumutu ne’e reforsa kompromisu governu nian ba adezaun ba ASEAN, ho fokus ba dezenvolvimentu abranjente, haforsa relasaun diplomátika, no kumpre kritériu infraestrutura no administrativa sira.

Timor-Leste nia objetivu mak atu sai membru ASEAN ba da-11, ne’ebé reflete ninia dedikasaun ba integrasaun rejionál no kresimentu.

Notisia relevante: PR Horta-PM Xanana diskute preparasaun TL nia adezaun ba ASEAN

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!