iklan

EDUKASAUN, HEADLINE

FDCH fó bolsa parsiál ba estudante 3.030 husi IES 17

FDCH fó bolsa parsiál ba estudante 3.030 husi IES 17

Diretór Ezekutivu FDCH, Júlio Aparício. Imajen Tatoli/Francisco Sony

DILI, 21 juñu 2024 (TATOLI)–Fundu Dezenvolvimentu Kapitál Umanu (FDCH, sigla portugés) fó bolsa parsiál ba estudante 3.030 husi Institutu Ensinu Superiór (IES) 17 iha Timor-Leste.

Diretór Ezekutivu FDCH, Júlio Aparício, hateten, Konsellu Administrasaun revoga ona programa bolsa hakbiit no aprova fali bolsa parsiál hodi selu bolseiru sira-nia propina.

“Iha loron 06 juñu, ami konsege aprezenta ba Konsellu Administrasaun hodi aprova orsamentu ne’ebé prevee la to’o tanba revoga ona, entaun osan laiha. Estadu nafatin iha obrigasaun ba ita-nia estudante hodi atribui bolsa hakbiit, maibé ami la tau naran bolsa hakbiit maibé tau bolsu parsiál. Nune’e, ami selu mak sira-nia propina tanba entre sira ne’e eskola iha universidade privadu ne’ebé selu karun, entaun iha tempu ne’ebá ami fó opsaun rua, ida mak ami fó osan $150 ba kada ema ba tinan-ida nian, ida-ne’e maizumenus gasta osan rihun $460-resin ba bolseiru 3.030, enkuantu seluk mak selu propina estudante nian, nune’e Konsellu Administrasaun aprova no selu de’it propina,” Diretór informa ba Agência Tatoli, iha ninia knaar fatin, Colmera, sesta ne’e.

Iha área saúde liu-liu iha universidade privada sira, hetan pagamentu semestre ida $200-$300, tanba ne’e orsamentu ne’ebé prevee la to’o.

Notísia relevante : FDCH fó bolsa estudu parsiál ba estudante 1.000

Konsellu Administrasaun aprova selu propina ho montante orsamentu millaun $1,4 ba bolseiru programa bolsa parsiál.

“Maibé ami esplika ba Konsellu Administrasaun katak entre sira barak mak eskola iha universidade privada sira, maski propina millaun $1,4 ne’e boot maibé ida-ne’e mak ami hili no ikus Konsellu Administrasaun aprova hodi selu estudante sira-nia propina,” nia akresenta.

Daudaun ne’e halo prosesu no FDCH hato’o ona karta ba Reitór universidade sira hotu, katak sira bele hatama invoice mai nune’e bele selu sira-nia propina. Nune’e, iha fulan-jullu nia-laran FDCH organiza no bolu estudante kada universidade no fakuldade hodi mai asina kontratu foun nune’e hodi bele garante prosesu.

“Tanba liuhusi ida-ne’e mak ami iha direitu bele kontrolu sira tanba oportunidade ne’e labele gasta de’it tempu maibé la estuda ho di’ak. Iha estudante 1.000 husi totál 3.030 ne’e valór di’ak no Universidade Nasionál Timor-Lorosa’e (UNTL) iha estudante 800 mak hetan bolsa parsiál,” nia tenik.

Estudante ne’ebé valór ladi’ak ne’e FDCH esplika ba Konsellu Administrasaun katak sira mós iha direitu hetan, ho kondisaun nafatin akompaña no halo kontrolu, suporta no motiva.

“Kuandu to’o dezembru mak sira la aproveita 75%, mak sei iha sasukat mak liuhusi valor, mak ezemplu Fakuldade Siénsia Humanitária mak IP lato’o 3.0 mak automátika kontratu hapara no mós ba Fakuldade Siénsia Teknolójia ho IP mak la to’o 2.75. Ida-ne’e obriga ami tenke halo tanba sei estudante seluk ne’ebé iha liur mós presiza maibé lá hetan oportunidade,” direjente haktuir.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!