Governu hatuur fatuk dahuluk sentru produsaun masin iha Oé-Cusse

OÉ-CUSSE, 21 juñu 2024 (TATOLI) – Governu liuhusi Ministériu Komérsiu no Indústria (MCI, sigla portugés) sesta ne’e lansa sentru produsaun masin iha Lagoa Maesmone, lokaliza iha aldeia Maquelab, suku Taiboko, sub-rejiaun Pante Makasar Rejiaun Administrativa Espsiál Oé-Cusse Ambeno (RAEOA).

“Masin hanesan matéria prinsipál ba indústria, alende ita ba konsumu loro-loron nian, ita-nia nasaun viziñu mós presiza, ita espera katak ho sentru produsaun masin integradu ne’e, sei lori mós mudansa ba komunidade sira iha Taiboko,” Ministru Komérsiu no Indústria, Nino Pereira hateten.

Notísia relevante: MCI identifika Lagoa Maesmone iha Oé-Cusse poténsia indústria masin

Governante ne’e, fó sai sentru produsaun masin integradu ne’e, sei kria serbisu ba joven sira, katuas ferik sira-ne’e sei forsa bele serbisu hetan osan, bele atende oan sira ba eskola, atende nesesidade família no nesesidade seluk.

“Ita-nia esperansa mak ne’e, katak bele kontribui hadi’a ekonómia komunidade nian, ho rikusoin ne’ebé ita prodús bele apoia ita-nia nesesidade rai laran, kontribui ba rendimentu Fundu Espesiál  Dezenvolvimentu RAEOA nian, maske la barak maibé ita sei kontribui, ida-ne’e mak ita hakarak atinje atu diversifisika ita-nia ekonómia katak ita sei la depende totálmente tán osan mina nian, fatin seluk mak setór agrikultura, peska pekuária, indústria atividade komérsiu sasán sirkula tama sai no seluk tan, nune’e bele sustenta ita-nai dezenvolvimentu iha rai ne’e,” nia katak.

Koordenadór ZEEDOA, João Mendes Gonçalves, reprezenta Prezidente Autoridade RAEOA konsidera polítika ne’e sei kria kampu traballu ba populasaun sei fó mós rendimentu ka reseita Estadu,

“Ha’u fiar katak iha futuru sei ajuda Oé-Cusse nia dezenvolvimentu  ba oin, investimentu ida-ne’e sei kontribui hadi’a ekonómia no halakon ki’ak iha Oé-Cusse, ita hotu tenke apoia, husu Oé-Cusse oan hotu kolabora no tau interese rejiaun nian atu hadi’a ita-nia rai,”  nia dehan.

Xefe suku Taiboko, Mateus Naz, agradese tanba Governu hili suku Taiboko atu harii indústria ba produsaun masin. Tan ne’e nia reprezenta komunidade aldeia haat, promete sei koopera hodi kontribui ba prosesu dezenvomentu produsaun masin ne’e.

“Ami sei apoia no kolabora tan ne’e di’ak ida ba ha’u-nia suku, tanba rai ne’e komunidade Taiboko aldeia haat nian, tan ne’e bainhira kompañia ne’ebé mai halo produsaun persiza koopera serbisu hamutuk ho komunidade,” nia katak.

Notísia relevante:MCI ho lia-na’in Taiboko realiza serimónia rituál molok lansa sentru produsaun masin iha Lagoa Maesmone

Entretantu, daudaun ne’e ekipa tékniku hahú halo ona levantamentu, faze tuir mai sei aprezenta ba Konsellu Ministru kona-bá gastu orsamentu ba investimentu ne’e.

Jornalista: Abílio Elo Nini

Editór: Evaristo Soares Martins