DILI, 22 juñu 2024 (TATOLI)—Tribunál Supremu Justisa liuhusi Juiza prosesu, Jacinta Correia, iha sesta (21/06) ne’e, hasai mandadu judisiál ne’ebé deside liberta totál fujitivu Arnolfo Teves Jr, husi prizaun domisiliáriu, ho NUC 0024/24/TR.
“Ha’u haruka atu hasai kedan estraditadu ne’ebé temi iha kraik husi prizaun, bainhira laiha prosesu seluk hasoru nia,” Juiza, Jacinta Correia, hateten liuhusi nota mandadu libertasaun, ne’ebé Agência Tatoli asesu, sábadu ne’e.
Iha mandadu ne’e mós Tribunál Rekursu deside hodi hakotu proibisaun auzénsia tuir artigu 192 husi Kódigu Penál Timor-Leste, ne’ebé bele autoriza fujitivu Arnolfo Teves Jr bele sai husi territóriu nasionál sein hetan autorizasaun husi Tribunál Rekursu.
Notísia relevante : Autoridade polisiál asegura Fuzitivu Arnolfo hafoin liberta hosi Tribunál
Nune’e, Tribunál Justisa deside aplika de’it aprezentasaun períodika ba fujitivu Arnolfo semana ida dala-rua hodi.
Antes ne’e, Supremu Tribunál Justisa iha kuarta (12/06) hasai mandadu judisiál ida hodi aplika prizaun domisiliáriu ba fujutivu Arnolfo Teves Jr to’o konklui prosesu legál.
Iha sesta (21/03) maizumenus tuku 16:00 lorokraik, Polísia Sientífika no Investigasaun Kriminál (PCIC, sigla portugés) halo detensaun internasionál hasoru sidadaun Filipina, Arnolfo Teves Jr, iha área Cristo Rei bainhira sidadaun ne’e halimar Golf.
Atuasaun ne’e tanba simu informasaun husi International Criminal Police Organization (Interpol) no National Bureau of Investigation (NBI), katak sidadaun ne’e komete krime asasinatu ida iha Filipina.
Fujitivu Arnolfo Teves Jr to’o iha Timor-Leste iha loron 27 abríl 2023 no liu deit loron-ida, nia husu kedan azilu polítiku ba Estadu Timor-Leste, ne’ebé ikus mai hetan hetan rejeita.
Arnolfo Teves antes ne’e hetan detensaun iha prizaun Becora hodi hein desizaun Tribunál.
Jornalista : Natalino Costa
Editora : Julia Chatarina
