DILI, 10 juñu 2024 (TATOLI) – Polísia Nasionál Timor-Leste (PNTL) liuhosi Departamentu Investigasaun Kriminál (DIK) Nasionál asegura Fuzitivu Arnolfo Teves Jr hafoin Tribunál liberta hosi medida koasaun prizaun preventiva.
Autoridade polisiál ezekuta mandadu detensaun hosi Tribunál Rekursu ho númeru NUC 0024/24.TR DIL, iha segunda, ohin, (10/6), oras 16:00, tanba Arnolfo iha hela nia rezidénsia no halimar golf, Metiaut, maibé autoridade sira konsidera nia iha perigu nia-laran.
Hafoin Tribunál liberta, iha tuku 16:00, autoridade simu mandadu judisiál iha tuku 18:00 hodi detein fila fali Arnolfo iha Metiaut no lori kedan ba Departamentu Investigasaun Kriminál hodi asegura molok lori ba sela detensaun Komandu Dili.
Ajenda ne’ebé Tatoli asesu katak Arnolfo sei submete ba prosesu audisaun iha Tribunal Rekursu, aban, tersa (11/6) iha tuku 8:00.
“Iha audisaun ne’e Tribunal Rekursu sei rona deklarasaun fuzitivu nian no sasin na’in-tolu hosi fuzitivu ne’ebé mai hosi Filipina. Agora daudaun iha ona Timor-Leste. Hafoin ne’e Tribunal sei tetu hodi deside halo estradisaun hodi haruka fila Fuzitivu ne’e ba nia nasaun orijen Filipina ka mantein hela iha Timor-Leste”, sita hosi komunikadu ne’ebé Tatoli asesu, ohin.
Molok PNTL halo detensaun ba fuzitivu Arnolfo Teves Jr iha Metiaut to’o sela detensaun, Komandu PNTL Dili hetan akompañamentu hosi nia Advogadu na’in-rua iha Timor-Leste inklui nia Advogadu Privadu Ferdinan Topacio hosi Filipina no nia família sira inklui Komisaun Direitus Humanus hosi Filipina.
Notísia relevante : Fuzitivu Arnolfo hakerek misiva nakloke ba Amu Papa no ONU
Tribunál Supremu Justisa sei rona tan testemuña, hafoin foti desizaun ba fuzitivu Arnolfo
Jornalista : Natalino Costa
Editór : Zezito Silva
