DILI, 06 juñu 2024 (TATOLI) – Prokuradór Jerál Repúblika (PJR), Alfonso Lopes hatete, Supremu Tribunál Justisa (STJ) sei rona tan testemuña hafoin foti desizaun ba fuzitivu Arnolfo Teves Jr hafoin fotidesizaun.
“Kazu fuzitivu Arnolfo Teves Jr agora ita sei iha produsaun de prova, no agora hein rezultadu husi Tribunál Rekursu tanba tuir Lei númeru 15/2011, nia prosedimentu mak ita tenke rekorre ba prazu ne’ebé iha no sei iha loron-15 Tribunál sei rona testemuña ne’ebé propoin husi parte suspeitu. Ikus liu loron lima ba alegasaun no loron 10 tan Tribunál bele hasai desizaun ba fuzitivu ne’e”,Alfonso katak ba jornalista sira iha Palásiu Prezidensiál Dili, kinta ne’e.
PGR mós relata ba Xefe Estadu hanesan mós altu majistradu iha Timor-Leste tanba preokupa tebe-tebes kona-ba kazu fujitivu Arnolfo Teves Jr, maibé Xefe Estadu nafatin respeita servisu Tribunál ne’ebé nu’udár órgaun ida independente ne’ebé sei hala’o hela servisu dentru legalidade.
Tuir Alfonso, kona-bá pozisaun ne’ebé defende husi fujitivu Arnolfo Teves Jr submete ba STJ ne’e hanesan prinsípiu kontraditóriu no Tribunál konsidera mós.
Antes ne’e iha loron 20 maiu 2024 Ministru Justisa (MJ), Sergio da Costa Hornai, hateten Governu deside liuhusi estradisaun ba fuzitivu Arnolfo Teves Jr hodi haruka fila ba nia nasaun orijen Filipina.
Desizaun ne’ebé mak Governu liuhosi Ministru Justisa foti ba Fuzitivu Arnolfo Teves Jr mak halo estradisaun ba fuzitivu ne’e signifika Governu admite hodi haruka fila fali fuzitivu refere ba nia nasaun orijen Filipina.
Rekorda fali katak sidadaun Filipinu ho naran Arnolfo Teves JR molok ne’e, iha kinta 22 fulan- marsu 2024 mak autoridade PCIC halo detensaun internasionál bainhira sidadaun ne’e halimar hela Golf iha area Metiaut Cristo Rei nian.
Autoridade PCIC detein sidadaun Filipinu ne’etanba autór intetuál ba krime asasinatu iha Filipina hodi oho Governadór ida iha Filipina. No sidadaun ne’e sai fuzitivu no autoridade PCIC kaer iha Dili.
Jornalista: Hortencio Sanchez
Editór: Florencio Miranda Ximenes
