DILI, 24 juñu 2024 (TATOLI)—Ministériu Edukasaun (ME) liuhosi Institutu Nasionál Formasaun Dosente no Profissionál Edukasaun (INFORDEPE), segunda ne’e, kontinua fó formasaun lian portugés ba profesór hamutuk 30 husi Eskola Ensinu Sekundáriu Jerál no Tékniku Vokasionál, hahú loron 24 to’o 28 juñu 2024.
Diretór Servisu Edukasaun munisípiu Ainaro, Patrício da Costa, hateten, objetivu husi formasaun ne’e mak atu kapasita no hasa’e koñesimentu kada profesór kona-ba lian portugés ne’ebé utiliza iha prosesu aprendizajen.
“Ohin ne’e formasaun lian portugés ba profesór sira husi Ensinu Sekundáriu Jerál no Tékniku Vokasionál nian. Formasaun ida-ne’e importante tanba atu hasa’e ita-nia profesór sira-nia koñesimentu kona-ba lian portugés. Tanba ne’e planu Ministériu Edukasaun liuhusi INFORDEPE hodi fasilita formasaun ne’e,” Diretór informa ba Agência Tatoli, via telefónika, segunda ne’e.
Nune’e, nia husu ba partisipante hotu atu tuir formasaun ne’e ho di’ak tanba hanesan bukae ida hodi haforsa no aumenta koñesimentu tanba lian ne’e importante.
Prezidente INFORDEPE, Domingos Martins, konsidera, formasaun ne’e hanesan bukae ida nune’e husu ba partisipante sira atu implementa iha saladeaula.
“Matéria ne’ebé imi hetan ida-ne’e hanesan bukae ida ba imi, nafatin apreende maski formasaun ne’e hotu ona, tanba imi mak hanesan lalenok ida ba alunu sira, tuir formasaun lian portugés nível B2 Projetu Pro-Portugés ne’e hanesan formasaun ida-ne’ebé mak nível a’as ona iha Timor-Leste. Tanba ne’e bukae ne’ebé mak imi hetan labele lakon, tenke fahe ba estudante sira,” Prezidente dehan.
Formasaun ne’e realiza husi INFORDEPE, ne’ebé ninia abertura iha loron 05 setembru 2019, enserra iha loron 17 juñu 2024. Formadu na’in-128 no formadór na’in-haat, kompostu husi postu administrativu Ainaro, Hatu-udu, Hatubuilico, no Maubisse.
Notísia relevante : INFORDEPE fó formasaun koñesimentu lian ba profesór na’in-31 ESTV
Diretór Servisu Edukasaun munisípiu Ainaro, dehan, profesór husi pre-eskolár to’o ensinu sekundáriu jerál no ensinu tékniku vokasionál hamutuk 128 tuir formasaun lian portugés nível B2, ne’ebé enserra ona iha sábadu (21/06) semana kotuk.
Formasaun ne’e durante tinan-rua fulan-10, ne’ebé formasaun ne’e oferese husi ME liuhusi INFORDEPE ba nível eskolaridade.
Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes, hateten, objetivu jerál husi projetu Pro-Portugés ne’e nesesáriu atu kontribui ba konsolidasaun sistema edukasaun Timor-Leste nian liuhusi apoiu ba setór formasaun profisionál no kontinua sai hanesan mestre ba sistema ensinu superiór. Ida-ne’e la’ós de’it objetivu edukasaun nian, apelu ba asaun, kompromisu no investimentu iha rekursu ne’ebé folin-boot liu ba foin-sa’e timoroan sira.
“Ministériu Edukasaun estabelese hamutuk ho Institutu Kooperasaun no Camões atu hametin lian no komunikasaun ba ita-nia profesór sira. Ida-ne’e hanesan pilár sira ne’ebé ita sei harii iha sosiedade ida, kursu lian portugués – nível B2 iha Ainaro hametin liután lian portugués hamutuk ho professór/a sira,” Sekretáriu Estudu dehan.
Jornalista : Osória Marques
Editora : Julia Chatarina
