Pasiente na’in-8 mate loron ida iha HNGV ne’e “Hoax”
DILI, 24 juñu 2024 (TATOLI)–Diretora Ezekutiva Hospitál Nasionál Guido Valadares (HNGV), Cecilia Barros Mendonça, klarifika informasaun espalla iha mídia sosiál katak “SETÓR SAÚDE PROBLEMA BOOT; Iha HNGV ema na’in-ualu (8) mate iha oras 24 nia laran, iha domingu (23 juñu 2024)” tanba ahi mate ne’e, informasaun falsa ka Hoax,
“Iha ne’e, ha’u hakarak hateten informasaun ne’e Hoaks ka falsu ka la loos. Realidade Konsellu tun mai laiha ema ida mate,” Diretora Ezekutiva Hospital Nasionál Guido Valadares (HNGV), Cecilia Barros, hatete ba jornalistas sira liuhosi konferénsia imprensa ne’ebé realiza iha HNGV, Bidau, segunda ne’e.
Nia esplika, ahi mate ne’e akontese iha teritóriu laran tomak tanba falla iha sentru Hera nian. Durante ahi mate bne’e, konsellu diretivu HNGV nian tun diretamente hodi haree no organiza, no buat hotu la’o di’ak.
“Horikalan viral tebes kona-ba ahi mate mak akontese iha HNGV. Ahi mate komesa tuku haat ho balun, durante oras haat nia laran. HNGV iha jeradór rasik atu responde ba ahi mate ida-ne’e,” nia dehan.
Ema-ne’ebé mate iha HNGV la’ós impaktu husi ahi mate ne’ebé akontese iha oras balun nia laran.
Nia esplika, ema sira-ne’ebé mate hamutuk na’in-haat (4) iha HNGV hanesan bebé na’in-rua (2) no ema boot iha na’in-rua (2) ne’ebé baixa ka internadu iha ospitál.
“Ema na’in-haat (4) ne’ebé mak mate ne’e mak bebé na’in rua, antes mai iha emerjénsia ne’e ho kondisaun grave ne’e mate no na’in-rua (2) kondisaun grave iha ospitál ne’e mak mate. Maibé, laiha ligasaun ho ahi mate,” nia hateten.
Jornalista : Jesuína Xavier
Editór : Cancio Ximenes
