PN eleze Rui Pereira sai komisáriu CAC ho votu afavór-41

DILI, 24 juñu 2024 (TATOLI)—Parlamentu Nasionál (PN), segunda ne’e, liuhusi reuniaun plenária, hala’o eleisaun eskrutinu ho rezultadu votasaun afavór 41, kontra ha’at (4) no abstensaun zero, nune’e eleze Rui Pereira dos Santos sai Komisáriu Komisaun Anti-Korrupsaun (CAC, siglá portugés) ba mandat tinan haat.
Notísia Relevante: PN sei ajenda eleisaun komisáriu CAC iha 24 juñu
“Ita-nia eleisaun ne’ebé la’o demokrátiku, ne’ebé legál no ita-nia votasaun ba kandidatu ne’e pasa,” Prezidente Parlamentu Nasionál (PPN), Maria Fernanda Lay, hato’o iha sala plenária Parlamentu.
Prezidente Parlamentu Nasionál (PPN) hato’o agradesimentu aba prezenta bankada opozisaun hodi akompaña prosesu eleisaun ne’e to’o ramata.
Antes eleisaun, Sekretária meza PN, Virgínia Ana Belo, lee sai karta husi Governu kona-ba asuntu proposta Governu ba kargu komisáriu CAC, hodi informa ba PPN katak Konsellu Ministru (KM) iha 12 Juñu 2024 delibera aprova indikasaun ba PN, Rui Pereira dos Santos ba kargu komisáriu CAC tuir termu númeru 1 artigu 7 iha lei númeru 8/2009, 15 Jullu, kona-ba Komisaun Anti-Korrupsaun (CAC, siglá portugés) altera husi lei númeru 1/2024, 8 Maiu, ne’ebé konsta ho kuríkulu vitae no anexu, Rui Pereira dos Santos, kumpre rekezitu sira iha lei númeru 8/2009.
Ba proposta ne’e hato’o husi Primeiru-Ministru interinu no Vise-Primeiru-Ministru, Francisco Kalbuady Lay.
Rui Pereira sei hala’o knaar ho imparsiál
Sekretáriu meza PN lee sai mós karta deklarasaun aseitasaun husi Rui Pereira ba kargu Komisáriu CAC ne’ebé hato’o katak sei hala’o knaar ho imparsiál.
“Ha’u naran kompletu, Rui Pereira dos Santos, deklara aseita ba kargu Komisáriu CAC ne’ebé propoin husi Governu Konstituisionál da-sia lidera husi Primeiru-Ministru, Kay Rala Xanana Gusmão, konfiansa ne’ebé ha’u simu sei kumpre hodi ezerse funsaun nu’udar komisáriu CAC sei serbisu ho profisionál, independente, imparsiál no kumpre ba konstituisaun, lei no regulamentu sira, tau aas interrese komún no nasaun aas liu interrese pesoál,” refere karta aseitasaun Rui Pereira ne’ebé sekretária Meza PN lee sai.
Deputadu PD, Armando Lopes, hateten durante tinan ida ho balun ona kargu komisáriu CAC mamuk hela no labele husik kargu ne’e mamuk, tan ne’e ohin liuhusi eleisaun eleze ona Rui Pereira atu asume kargu ne’e hodi kontinua no espera depois nia hetan pozisaun ne’e nia bele serbisu ida-ne’ebé sala ne’e sala duni no loos ne’e loos duni, imparsialidade ne’e importante ba CAC.
Entretantu, iha ajenda eleisaun komisáriu CAC ne’e Deputadu sira husi bankada opozisaun FRETILIN hotu-hotu auzente.
Bankada FRETILIN deside la partisipa
Liuhusi komunikadu imprensa ne’ebé Ajénsia Tatoli asesu husi bankada FRETLIN katak, bankada FRETILIN konsidera eleisaun ba Komisáriu CAC importante tebes atu bele kumpre kompromísiu Estadu nian ba luta kontra korrupsaun, maibé bankada deside la partisipa iha eleisaun tanba kandidatu ne’ebé Governu propoin la prienxe rekezitu legál tuir lei CAC, artigu 8 pontu 2 katak, “Kandidatu komisáriu CAC tenke rekoñesidu ninia independénsia no imparsialidade ne’ebé ho nivél aas,”
Aleinde ne’e, artigu 11. (g) Lei no.1/2024, 8 Maiu, kona-ba alterasaun daruak ba lei CAC hafraku funsaun Komisáriu CAC tanba bele hetan ezonerasaun hosi Parlamentu Nasionál bainhira nia promove investigasaun ruma hasoru membru Governu ka lideransa Partidu sira-ne’ebé hola parte iha maioria Parlamentar ka iha Governu.
“Argumentu ida-ne’e mak dezde iha kedas inisiu halo Bankada FRETILIN kontra ideia ne’ebé elemina rekezitu minimu iha lei anteriór hodi kontra natureza CAC nian.
Jornalista : Nelson de Sousa
Editór : Cancio Ximenes

