Prezidente Komisaun C preokupa ezekusaun orsamentu ba kapitál dezenvolvimentu- fundu infraestrurua sei kiik

DILI, 24 juñu 2024 (TATOLI)–Prezidente Komisaun C ne’ebé trata asuntu Finansa Públika iha Parlamentu Nasionál (PN), Cedelísia Farria dos Santos, preokupa ho ezekusaun Orsamentu Jerál Estadu (OJE) 2024 iha kategoria kapitál dezenvolvimentu no fundu infraestrutura nian ho persentajen kiik.
“Ha’u-nia intervensaun ohin hakarak foka ba ezekusaun OJE 2024, liuliu foka ba kapitál dezenvolvimentu no fundu infraestrtura. Tuir dadus husi portál tranparánsia hatudu katak, orsamentu ne’ebé mak aloka ba kapitál dezenvolvimentu ho totál millaun $413 nia ezekusaun to’o loron ohin, ninia ezekusaun real la inklui kompromisu foin mak atinji 12,8%. Se ita inklui kompromisu mós ninia ezekusaun sei kiik-oan tanba foin atinje 24%. Iha parte seluk, orsamentu ne’ebé mak aloka ba fundu infraestrutura ho totál orsamentu millaun $301,3 ninia ezekusaun to’o ohin nafatin, se ita la inklui kompromisu nia foin mak atinje 10,8%. Se inklui mós, nia sei kiik-oan no foin mak arinje 15%,” nia levanta liuhusi reuniaun plenária Parlamentu Nasionál, segunda ne’e.
Tuir nia, taxa ezekusaun ida-ne’e kiik-oan tebes tanba semana oin termina ona trismestre daruak no fulan-jullu tama ona ba trimestre datoluk, maibé ezekusaun iha kategoria rua ne’e kiik tebes.
“La sai hanesan ita-nia espetativa. Klaru, ha’u konkorda katak ita-nia ezekusaun ita mós tenke haree prosesu sira-ne’ebé mak Governu anteriór ne’ebé mak halo iha problema barak, ita tenke haree. Maibé, ita atu tama ona ba terseiru trimestre, ami husu ita-boot sira atu tau atensaun,” nia hateten
Maibé, Deputada husi bankada CNRT ne’e ne’e dehan, ezekusaun ne’e la’ós kapitál dezenvolvimentu ho fundu infraestrutura de’it, se problema ne’e iha lei ka dekretu-lei ruma ne’ebé iha halo Governu ezekuta OJE husu atu halo avaliasaun.
“Ha’u-nia pergunta mak ne’e. Problema ne’e iha ne’ebé, la sala dekretu-lei ne’ebé mak VIII Governu Konstitusionál halo númeru 22/ 2022 ne’e mak sai problema ka. Se problema, husu Governu atu haree fila-fali halo avaliasaun, haree se lei ne’e problema ita altera. Tanba, ita hakarak dezenvolvimentu povu hein hela, ita tau ona orsamentu favór ida ezekuta bá,” nia dehan.
Liuhusi reuniaun plenária, reprezentante Governu liuhusi Sekretária Estadu Igualidade (SEI), Elbina de Sousa, responde katak bainhira haree fali ba ein-jerál ba Governu nia ezekusaun OJE 2024, hanoin Governu konstituisionál da-sia mós komprometidu atu bele halo ezekusaun OJE ho kualidade no mós ho kuidadu tanba osan ne’e povu nian.
Notísia Relevante: PN konsidera ezekusaun OJE 2024 sei kiik
Jornalista : Nelson de Sousa
Editór : Cancio Ximenes

