Deputadu CNRT-KHUNTO garante komisáriu CAC eleitu serbisu ho imparsialidade
DILI, 25 juñu 2024 (TATOLI)—Deputada husi bankada CNRT, Cedelízia Farria dos Santos, garante Komisáriu Komisaun Anti-Korrupsaun (CAC, siglá portugés) eleitu, Rui Pereira dos Santos, sei serbisu ho imparsialidade.
Notísia Relevante: PN eleze Rui Pereira sai komisáriu CAC ho votu afavór-41
“Hakarak hato’o parabéns ba ita-nia komisáriu eleitu, ne’ebé mak horisehik eleitu ona ho votu afavór-41. Nia merese duni hetan votu ida-ne’e, ho ninia karreira profisionál iha parte legál nian, merese duni hetan tuur iha kna’ar ida komisáriu nian ne’e sei garante serbisu ho imparsialidade,” nia hateten ba jornalista sira iha resintu Parlamentu Nasionál, tersa ne’e.
Deputadu husi bankada Governu ne’e hateten, kona-ba preokupasaun bankada FRETILIN nian hanoin normál hanesan bankada opozisaun, maske horisehik iha bankada opozisaun PLP no KHUNTO partisipa iha eleisaun komisáriu CAC no so de’it bankada FRETILIN mak la partisipa.
“Agora sira mosu fali ho sira-nia komunikadu imprensa kestiona ita-nia komisáriu eleitu nia profisionalidade, ha’u hanoin ne’e la lo’os. Ha’u mós estrutura ida iha partidu, maibé ha’u nunka haree Rui Pereira tama iha estrutura partidu ninian. Ne’ebé, ha’u rejeita totalmente hanesan kuadru ida husi partidu no hanesan Deputadu ida husi bankada Governu,” nia hateten.
Nune’e, nia rejeita totál informasaun ne’ebé iha katak Rui Pereira tama iha estrutura partidu nian ne’e hoax ka informasaun la-loos.
Komisáriu eleitu iha nia kuríkulu vitae iha ne’eba mós hatudu ninia karreira profisionál iha parte legál nian katak nia merese duni tuur hanesan komisáriu CAC.
Kestaun ida seluk mak komisáriu CAC nia fatin mamuk kleur ona, ne’ebé presiza iha ona ema ida atu serbisu hodi kombate korrupsaun, entaun labele dada tan tempu hodi hala’o eleisaun.
Tanba ne’e, nia dehan, bankada Governu horisehik realiza duni inklui hetan apoiu husi bankada opozisaun PLP no KHUNTO, maske iha bankada balun vota kontra.
“Garante serbisu ho imparsialidade, tanba ha’u hatene nia la’ós hola parte kuadru husi partidu A ka B maibé ninia karreira profisionál naruk tebe-tebes mak to’o ida-ne’e. Tanba ne’e, ha’u garante katak nia imparsialidade hala’o desizaun ba CAC, ne’e hanesan Deputadu ha’u garante ba ida-ne’e,” nia dehan.
Deputadu KHUNTO, António Verdiál de Sousa, haree ba entidade CAC ninia lideransa másimu laiha tinan ida resin ona, ho nune’e dezde uluk bankada KHUNTO partisipa iha prosesu tomak hahú husi inísiu to’o ba horisehik rezulta votasaun ne’e, bankada sempre husu ba Governu atu lalais.
Ida-ne’e, nia hateten, ho objetivu serbisu sira-ne’ebé iha CAC la’o hanesan baibain no KHUNTO fó votu afavór, hakarak iha lideransa CAC hodi bele hala’o serbisu.
Nia dehan, bankada nia observasaun haree ba personalidade komisáriu CAC eleitu ema ida–ne’ebé serbisu iha área judisáriu kle’ur ona hahú husi administrasaun UNTAET nia hanesan juíz ida.
Hafoin ne’e, nia hola parte iha PDHJ no fó serbisu asesória tékniku jurídiku ba iha munisípiu sira, ne’ebé ninia espíritu jurídika ne’e di’ak no pesoalmente bankada fó fiar tomak ida-ne’ebé hala’o kna’ar tuir de’it lei, independente, responsabilidade ho profisionál.
Jornalista : Nelson de Sousa
Editór : Cancio Ximenes
