Jestór kafetaria enkoraja maluk foin-sa’e labele tauk foti desizaun loke negósiu
DILI, 25 juñu 2024 (TATOLI)—Jestór Saudades Resto no Coffee, Francisco Sarmento Barbosa, enkoraja ba maluk foin-sa’e sira atu labele tauk foti desizaun bainhira atu loke negósiu ida.
“Mensajen ba maluk foin-sa’e sira relasiona ho loron mundiál ba mikro, pekena, no médiu empreza nian ne’ebé sei monu iha loron 27 juñu, husu ba maluk foin-sa’e sira ne’ebé daudaun hakarak halo negósiu labele tauk foti desizaun,” Jestór Restaurante no Kafetaria hateten ba Agência Tatoli, iha ninia knaar fatin, Mandarin, tersa ne’e.
Nia dehan, joven sira ne’ebé iha ona esperénsia no kapasidade di’ak liuhusi formasaun sira tenke kontinua buat ne’ebé mak iha tanba joven mak sai ai-rin nasaun.
“Entaun, ita osan iha tenke halo netik negósiu ruma hodi fó empregu ba maluk sira ne’ebé presiza serbisu,” nia akresenta.
Saudades Resto no Coffee harii husi joven na’in-tolu ho objetivu hakarak fó empregu ba joven sira ne’ebé presiza duni serbisu, tanba fundadór sira ne’e balun tuir ona formasaun iha ETDA, tanba ne’e abilidade ne’ebé sira iha hakarak aplika, entaun ikus mai foti desizaun loke negósiu.
“Ami sira ne’ebé serbisu iha ne’e mesak estudante hotu iha Universidade Nasionál Timor-Lorosa’e (UNTL), haree ami loron-loron ba eskola fila la halo buat ida ami-nia fundadór sira iha hanoin ho esperiénsia sira ne’ebé iha bolu ami hanorin fali hodi ami hatene, ikus mai loke fatin ne’e no fó serbisu ba ami,” Francisco Sarmento, tenik.
Notísia relevante : Vendedór hamutuk 47 mak laiha fatin negósiu iha Manleuana
Fatin ne’e eziste durante tinan-rua ona no maski iha Dili kafetaria barak maibé sira nafatin hili hakarak loke kafetaria tanba fiar katak negósiu ida-idak mai ho ida-idak ninia sorte rasik.
“Saudades Resto no Coffee laiha úniku iha ne’e, maibé ami loke ida-ne’e ho hanoin katak buat ne’ebé ita iha hanesan esperiénsia no kapasidade tenke kontinua haburas hodi sai ezemplar ba maluk sira seluk ne’ebé daudaun hakarak halo negósiu maibé foti desizaun tauk,” nia reforsa.
Durante ezisténsia iha dezafiu barak ne’ebé sira hasoru mak hanesan dalaruma iha kliente barak maibé dalaruma laiha liu.
“Iha vida negósiu ne’e konsidera normál. Iha negósiu ne’e buat ne’ebé ami fa’an mak hanesan kafé espresso, jus no seluk tan. Fulan-ida ami bele hetan osan $1.000, maibé osan sira ne’e selu fali traballadór sira, aluga fatin no sosa fali produtu sira sira,” Jestór relata
Saudades Resto no Coffee iha traballadór hamutuk na’in-neen kompostu husi tolu haree ba kafetaria no tolu haree ba restaurante.
Jornalista : Arminda Fonseca
Editora : Julia Chatarina
