iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU

Komunidade Kolimau -Tebabui husu MOP hadi’ak estrada

Komunidade Kolimau -Tebabui husu MOP hadi’ak estrada

Kondisaun estrada liga husi suku Kolimau, Tebabui, ba postu administrativu Bobonaro no postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 25 juñu 2024 (TATOLI)-Komunidade no líder komunitária suku Kolimau no Tebabui, postu administrativu Bobonaro, munisípiu Bobonaro husu Ministériu Obra Públika (MOP) atu tau prioridade iha orsamentu Jerál Estadu tinan 2025 hodi rezolve estrada ne’ebé kondisaun fíziku aat durante tinan 20-resin ona.

Komunidade Tebabui, Afonso do Nascimento, informa kondisaun estrada ne’e iha tempu udan difikulta tebes movimentasaun transporte públiku no privada atu asesu ba postu administrativu Bobonaro no kapitál Maliana.

Nia dehan, suku Tebabui no Kolimau, iha poténsia ba setór agrikultór ne’ebé riku ho koto, fehuk-ropa no seluk tan, maibé kondisaun estrada ladi’ak difikulta tebes komunidade agrikutór transporta produtu hirak-ne’e ba merkadu

Notísia relevante: Estrada rurál kilómetru 261 iha Bobonaro seidauk reabilita

“Ami -nia produtu lokál lori husi aldeia ba la di’ak, sasán iha hela, produtu fehuk-Ropa no koto, ami atu lori ba mós susar la halimar, dalaruma karreta la mai to’o ami-nia fatin, tempu udan aat liután. Ida-ne’e ba nai ulun sira bele tau matan netik ba estrada ne’e,” nia ko’alia iha Tebabui, tersa ne’e.

Sorin seluk, Xefe suku Kolimau, Teotónio de Carvalho, informa, problema ne’e líder komunitária sira hato’o beibeik ba parte kompetente maibé to’o agora seidauk tau priodade atu rezolve.

Nia dehan, problema ne’e afeta mós ba pesoál saúde sira atu transporta pasiente ho urjénsia ba Hospital Referál Maliana, tanba estrada aat hahú kedas husi suku Kolimau ba to’o Maliana Vila.

“Ita haree kondisaun ne’e grave tebes, ida-ne’e ba ami suku 18 iha postu Bobonaro ne’ebé oras ne’e sofre hela ba kondisaun estrada, ne’ebé oportunidade Prezidente Repúblika mai, ami nafatin husu ba Prezidente atu fo hatene ba Governu atu labele haluha. Karik orsamentu 2025 ne’e bele rezolve lalais ami-nia estrada,” nia fó hanoin.

Enkuantu estrada referida liga mós ba postu administrativu Atsabe, munisípiu Ermera.

Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe
Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!