DILI, 25 juñu 2024 (TATOLI) – Ministru Defeza (MD), Donanciano do Rosario Gomes “Pedro Klamar Fuik”, informa prosesu ba ró rua ne’ebé Governu Austrália atu ofrese ba Timor-Leste taka ona no deside lakohi atu simu oferta ne’e tanba bainhira halo manutensaun ho folin karun.
“Prosesu taka tiha ona, ita só simu saida mak ita hakarak, ita la’ós de’it atu simu saida mak ema hakarak atu fó ba ita, ita simu saida mak ita hakarak tuir ita nia kbi’it, la’ós ema fó de’it ita mós simu de’it, kuandu nia avaria nia manutensaun oinsá. Entaun Ministériu Defeza hateten ona ba Austrália obrigadu ba oferta ne’e, maibé ami la simu, ami simu de’it buat ne’ebé mak tuir ami nia kbi’it,” Ministru Klamar Fuik hateten ba jornalista sira iha Palásiu Governu, Dili, tersa ne’e.
Governante ne’e dehan, oferta ne’ebé Governu Austrália fó nunka tuir saida mak Timor-Leste hakarak no Timor-Leste laiha kbi’it atu utiliza ró rua ne’e.
“Ita la simu ho razaun mak hanesan, lojístika, orsamentu no pilítika, ne’e mak ita lakohi atu simu,” Governante ne’e esplika.
Rekorda fali katak, inisiativa Governu Austrália nian atu oferese ró rua ne’e mai FALINTIL-Forsa Defeza Timor-Leste (F-FDTL) komponente Navál desde 2017 no Austrália promete atu prepara didi’ak kondisaun antes oferta ka haruka mai Timor-Leste iha 2023 maibé la konsege.
Kestaun referidu, Governu anteriór halo ona akordu ida ho Austrália, maibé iha mandatu Ezekutivu ida ne’e sei haree filafali, nune’e bele hetan fali validasaun husi autoridade Estadu atubele implementa tuir saida maka Timor-Leste hakarak.
Kooperasaun militár entre nasaun rua ne’e lori benefísiu boot ida ba F-FDTL, tanba metade husi membru ne’ebé ativu hela bele ko’alia lian inglés.
Ró rua ne’e konstrui husi empreza Austral iha ámbitu Programa Seguransa Marítima Pasífiku, Governu Austrália nian. Valór totál pakote apoiu husi Austrália, inklui manutensaun ba ró rua durante tinan 30 kuaze millaun AUD$300.
Maibé haree ba kestaun hotu Governu dala sia ne’ebé lidera husi Primeiru-Ministru, Kay Rala Xanana Gusmão deside taka prosesu no lakohi atu simu oferta ne’e.
Notísia relevante:Komodoro Neves klarifika razaun Austrália seidauk entrega Ró patrollamentu rua
Jornalista: Hortencio Sanchez
Editór: Florencio Miranda Ximenes
