Reprezentante povu husu tau atensaun ba estrada rurál Railaco-Leorema
DILI, 25 juñu 2024 (TATOLI)-Reprezentante povu iha uma fukum Parlamentu Nasionál (PN), liuhusi Deputadu CNRT, Cedelízia Faria dos Santos, husu Ministériu Obra Públika (MOP) no Ministériu Administrasaun Estatál espesialmente prezidente autoridade munisípiu Ermera atu tau atensaun ba estrada Railaco ba Leorema (Liquiça).
Notísia Relevante: Deputadu CNRT husu Governu tau atensaun ba Estrada diresaun postu Uatulari
“Liuhusi oportunidade ne’e, hakarak levanta kestaun relasiona estrada rurál Railaco ba Leorema, estrada agora kondisaun ladi’ak bainhira kompara ho estrada iha tinan rua ikus ne’e. Triste tebes tanba estrada ne’ebé dook, dalan ladi’ak no laiha espasu no bainhira karreta hasoru malu meiu estrada perígu tebes ba ema ultrapasa,” nia levanta liuhusi reuniaun plenária Parlamentu, tersa ne’e.
Problema seluk ligasaun rodoviária ba aldeia Matata laiha konstrusaun, nune’e husu ba Ministériu Obra Públika (MOP) no Ministériu Administrasaun Estatál espesialmente prezidente autoridade munisípiu Ermera atu tau atensaun ba kestaun ne’e hodi fó konsiderasaun atu iha futuru konstrusaun ba estrada refere.
Nune’e mós, atu konsidera mós iha Orsamentu Jerál Estadu (OJE) tinan fiskál 2024 tanba atribui iha kapitál dezenvolvimentu ba munisípiu Ermera aloka totál orsamentu millaun $1,9, maibé to’o agora persentajen ezekusaun foin atinje 3,8%.
“Persentajen ne’e kiik tebes, tanba ne’e husu atensaun ba kestaun ne’e,” nia dehan.
Reprezentante Governu liuhusi Sekretária Estadu Igualidade (SEI), Elvina de Sousa, rejista preokupasaun ne’e no sei enkamina ba entidade tutela.
Jornalista : Nelson de Sousa
Editór : Cancio Ximenes
