DILI, 26 juñu 2024 (TATOLI)–Ajénsia Nasionál Avaliasaun Akreditasaun Akadémika (ANAAA), planeia ona atu halo akreditasaun ba programa 19 no instituisaun neen iha tinan ne’e.
“ANAAA tinan ida-ne’e planu halo akreditasaun programátika ba 19 programa estudu no akreditasaun instituisionál ba instituisaun neen, ne’ebé sei hahú iha fulan-juñu to’o outubru 2024,” Diretór Ezekutivu ANAAA, Nilton Diamantino Paiva Mau, informa ba Agência Tatoli, iha ninia knaar fatin, Balide, kuarta ne’e.
ANAAA iha loron 20 juñu 2024 liuhusi Ministru Ensinu Superiór Siénsia no Kultura (MESSK) abertura programa akreditasaun instituisaun no programátika iha Universidade Orientál Timor-Leste (UNITAL). Nune’e, iha loron 20 to’o 21 juñu halo akreditasaun instituisaun terseiru siklu iha UNITAL no akreditasaun programátika manajemen informátika iha Instituto of Business (IOB).
Notísia relevante : ANAAA sei halo peskiza ba graduadu la asesu merkadu traballu
Tuir mai iha loron 24 to’o 25 juñu, kontinua halo akreditasaun programa estudu fíziku iha Institutu Superiór Cristal (ISC) no programa estudu jestaun jerál iha IOB.
“Loron 26 to’o 27 juñu kontinua halo akreditasaun ba kursu informátika iha Dili Institute of Technology (DIT) no kursu relasaun internasionál iha Universidade de Dili (UNDIL),” Diretór Nilton dehan.
Tanba ne’e, ANAAA kontinua halo akreditasaun ba instituisionál no programátika to’o fulan-outubru no iha avaliasaun ida-ne’e reprezentante avaliadór internasionál husi Malaysian Qualifications Agency (MQA), hanesan Maniam Kaliannan, Hélio Xavier no Basílio Ribeiro.
Objetivu husi avaliasaun no akreditasaun ida-ne’e atu asegura elijibilidade no kualidade programa estudu jestaun públiku ne’ebé oferese husi IOB, prosessu avaliasaun no akreditasaun ne’e haktuir ba padraun no kritériu husi ANAAA no durante avaliasaun ida-ne’e avaliadór sira sei observa direita no halo konfirmasaun ba entidade sira relasiona ho relatóriu auto-avaliasaun ba kursu jestaun públiku ne’ebé submete mai ANAAA.
Vizita avaliasaun ida-ne’e hetan partisipasaun másimu husi Vise-Reitór no estrutura, dosente, unidade IQA, no pesoál apoiu sira seluk nomós vizita ba fasilidade inklui biblioteka ne’ebé maka iha departamentu jestaun públiku.
Jornalista : Osória Marques
Editora : Julia Chatarina
