DILI, 26 juñu 2024 (TATOLI)—Prezidente Komisaun C ne’ebé trata asuntu Finansa Públika iha Parlamentu Nasionál (PN), Celelízia Farria dos Santos, husu Bee Yimor-Leste Empreza Públika (BTL, E.P) atu hadi’a instalasaun kontadór bee-moos ba kliente sira hodi rekolla liután reseita ba Estadu.
“Ida-ne’e ami mós preokupa, tanba ami halo ona audiénsia ho EDTL, E.P no to’o agora ami hein hela relatóriu husi BTL, E.P. Ita-nia espetativa mak ne’e, sira bele rekolla reseita liután hodi kontribui ba reseita Estadu,” nia hateten ba jornalista sira iha resintu Parlamentu, kuarta ne’e.
Nia husu atu EDTL, E.P haree ba populasaun sira selu ida-idak nia kapasidade finanseiru no sira labele selu hanesan ho ema seluk ne’ebé iha osan.
Deputadu CNRT, Carminda Carlota, hateten BTL, E.P monta ona kontadór bee nian iha área hanesan Fomento no Delta III, hanoin planu ne’e di’ak tebes atu nune’e komunidade bele fó kontribuisaun liuhusi reseita ne’ebé kontribui ba Estadu bazeia ba utilizasaun bee-moos husi populasaun ba sira-nia nesesidade loro-loron nian.
Mezmu nune’e, problema mak kontadór sira BTL, E.P monta ona iha kada uma-kain to’o agora kontadór sira-ne’e la funsiona ho di’ak, no laiha razaun ne’ebé klaru to’o ohin loron tanbasá mak kontadór sira-ne’e seidauk funsiona.
“Tanba ne’e, hanesan reprezentante povu husu BTL, E.P, tanbasá mak kontadór sira-ne’e to’o agora la funsiona,” Deputada membru komisaun E ne’ebé trata asuntu infraestrutura ne’e hato’o.
Deputadu membru komisaun D ne’ebé trata asuntu Ekonomia no Dezenvolvimentu, Manuel Noronha, hato’o preokupasaun komunidade husi munisípiu Manufahi, postu Same kona-ba konsumidór bee-moos ne’ebé responsabiliza husi autoridade BTL, E.P ne’ebé dadaun ona selu taxa husi konsumidór sira, maibé públiku preokupa katak prosesu selu taxa ne’e rasik la efetivu no sei la hatudu transparánsia iha terrenu, tanba konsumidór sira selu direita ba ekipa ou funsionáriu BTL, E.P.
“Husu ba autoridade BTL, E.P halo mudansa ba pagamentu di’ak-liu direta ba edifísiu BTL, E.P iha kada munisípiu, Di’ak-liu sujere atu prosesu hotu tenke selu iha banku hodi garante ba efetividade no transparánsia, tanba selu taxa ne’e rasik sei kontribui ba reseita Estadu nian hodi kontribui ba dezenvolvimentu iha Timor-Leste,” nia dehan.
Tuir nia, taxa ho totál $3 ne’e la justu no injustisa ba komunidade baibain no empreza, loza ho ristorante sira, liuliu kompañia ne’ebé uza bee hodi uza fase karreta no motor, tanba sira utiliza bee barak liu duké povu baibain.
“Nune’e, hanesan reprezentante povu husu autoridade BTL, E.P di’ak-liu monta kontadór ka meteran hodi selu taxa bazeia ba utilizasaun bee ne’e rasik,” nia dehan.
Jornalista : Nelson de Sousa
Editór : Cancio Ximenes
