DILI, 26 juñu 2024 (TATOLI)—Ministériu Dezenvolvimentu Rurál no Abitasaun, liuhusi Diresaun Jerál Dezenvolvimentu Rurál (DGDR, sigla portugés) tinan ne’e sei foku ba programa ida ho nia sub-programa haat.
Diretór Jerál Dezenvolvimentu Rurál, Filipe Cardoso Vieira, hateten, bazeia ba Planu Asaun Anuál (PAA) tinan 2024, DGDR iha programa revitalizasaun komunitária ho nia sub programa haat mak hanesan kuadru nasionál planeamentu, dezenvolve infraestrutura sósiu ekonómiku rurál, dezenvolve kuadru legál no regulamentu ne’ebé permite inisiativa no projetu komunidade rurál, ikus mai kriasaun ambiente no investimentu iha área rurál.
“Atividade ne’ebé atribui mai iha DGDR to’o mai agora ita halo atividade rua hanesan, diagnóstiku ba área rurál sira no konstrusaun sintina públika sira ne’ebé konstrui hela iha kapitál,” Filipe Cardoso Vieira, hato’o liuhusi programa entrevista eskluziva, iha estúdiu Agência Tatoli, Farol, kuarta ne’e.
Notisia relevante : Governu destaka funsionáriu 140 ba aldeia 70 iha munisípiu 8
Programa revitalizasaun komunitária ne’e nia orsamentu prevee ba kategoria rua, kapitál dezenvolvimentu $250.000 no transferénsia públika $3.500.000.
Husi orsamentu ne’e, ba kapitál dezenvolvimentu nian sei kontinua konstrusaun sintina públika unidade 17, ne’ebé daudaun halo hela dezeñu no Bill of Quantities (BoQ) no kapitál dezenvolvimentu ne’e sei halo tranferénsia direita ba aldeia alvu sira hamutuk 70 husi munisípiu ualu iha postu administrativu 40 no suku 20 iha territóriu.
Razaun konstrusaun sintina públika ne’e tanba konsidera sai hanesan nesesidade prioritária ba entidade públiku, tanba liuhusi diagnótiku ne’ebé ministériu halo, autoridade lokál sira ezije liu harii sintina públika.
Entaun, ba tinan ne’e tuir pedidu sira husi autoridade lokál, DGDR planu sei harii tan sintina hamutuk unidade 17 iha munisípiu lima hanesan, Ainaro, Covalima, Bobonaro, Lautém, no Manatuto.
“Sintina Públika ne’ebé ita sei konstrui ninia prosesu daudaun iha planu dezeñu no BoQ. Bainhira ita estabelese ninia rekezitu tenke tau iha fatin públiku hanesan merkadu, asesu bee-moos no liña eletrisidade,” nia dehan.
Tuir Diretór, sintina públika agora sei iha diferansa oituan tanba bainhira harii hotu, ministériu sei prepara kondisaun halo rekrutamentu ba pesoál hodi fó formasaun no kontrola.
Jornalista : Arminda Fonseca
Editora : Julia Chatarina
