DILI, 26 Juñu 2024 (TATOLI) – Diresaun-Jerál Floresta halo apreensaun ba kilat manu hamutuk 25 iha Lautém no Viqueque husi grupu kasadór sira no agora entrega ona ba komandu Polísia iha munisípiu rua hodi halo destruisaun.
Diretór-Jerál Floresta, Raimundo Mau, hateten nia simu ona informasaun husi servisu guarda florestál Lautém no Viqueque katak entrega ona kilat sora ne’e ba komandu Polisia husi munisípiu rua ne’e atu foti desizaun hodi halo destruisaun, tanba evidénsia sira hanesan ne’e konsidera arma ne’ebé bele fó risku mós ba ema nia vida.
“Ita-nia korpu guarda florestál sira hato’o katak iha killat manu hamutuk 25 maka sira apreende ona, husi Viqueque 13 no Lautém 12”, Raimundo Mau dehan iha Caicoli, ohin.
Nune’e mós, Xefe Departamentu Guarda Floresta, Apolinário Freitas, lamenta tanba komunidade barak maka seidauk iha konxiénsia, tanba ne’e mak balun halo grupu hodi kontinua estraga rikeza sira ne’ebé moris iha rai ne’e.
Nia esplika katak iha Lautém parte Lore no Viqueque-Ossu, servisu guarda florestál foti kilat manu hamutuk 25 no ida ne’e hatudu populasaun sira seidauk kumpre regra, tanba ne’e diresaun husu ba ema hotu atu hadomi natureza hodi bele konserva balada fuik sira ne’ebé moris iha nasaun ne’e.
“Kilat manu sira ita foti ne’e sai mós evidénsia ida. Depois ita halo tiha relatóriu hotu no entrega ba komandu Polísia iha munisípiu rua ne’e hodi halo destruisaun”, nia afirma.
Tanba ne’e, parte Floresta sei halo vizilánsia másima hodi halo kontrolu bá atividade ilegál sira ne’ebé grupu kasadór sira halo.
Apolinário Freitas salienta katak iha ona konkordánsia entre Polísia no Floresta katak bainhira korpu sira kaer kasadór sira ho evidénsia maka sei entrega ba komandu Polísia hodi halo prosesu.
Notísia relevante: Guarda Floresta halo apreensaun ba kilat-manu unidade 13 iha Viqueque
Jornalista: Tomé Amado
Editora: Maria Auxiliadora
