DILI, 26 juñu 2024 (TATOLI)—Ministra Solidariedade Sosiál no Inkluzaun (MSSI), Verónica das Dores no Ministra Saúde (MS), Élia dos Reis Amaral, iha tersa (25/06), distribui ai-han ba abitante hamutuk 160 ne’ebé afetadu moras lepra, iha munisípiu Manatuto.
Ai-han sira ne’ebé oferese mak hanesan, foos, susu-been, manu-tolun no seluk tan.
“Ami na’in-rua mai tanba iha objetivu ida, atu apoiu ai-han ba maluk sira ne’ebé afeta ba moras lepra, atu hasa’e sira-nia nutrisaun, nune’e bele rekopera filafali sira-nia saúde,” Ministra Verónica da Dores, hateten, liuhusi nota ne’ebé Agência Tatoli asesu, kuarta ne’e.
Nia konsidera, atividade ne’ebé sira halo importante tenba bele tun direitamente hodi heree liu maluk sira ne’ebé maka afeta moras lepra.
“Tanba maluk sira ne’e balun halo tiha ona tratamentu, maibé presiza nutrisaun, entaun ohin mai lori ai-han ba maluk sira, atu nune’e rekupera filafila sira nia saúde. Ami sei kontinua apoiu nafatin ai-han hirak ne’e,” hatete Ministra Verónica.
Notísia relevante : OMS husu ema hotu kontribui elimina estigma ema afetadu lepra
Asosiasaun Transforma Lepra iha Timor -Leste (ATLETIL) antes ne’e identifika ona abitante 160 afetadu moras lepra.
Iha fatin hanesan, Ministra Saúde, Élia dos Reis Amaral, hateten, moras lepra ne’e mai husi mikro baktéria ne’ebé maka afeta ba ema-nia kulit, entaun moras ne’e bele halo liman, ain, no ibun sira sai difisiénsia.
“Ha’u husu ba inan ho aman sira atu hakbesik-an nafatin ba fasilidade saúde ne’ebé besik hodi halo tratamentu no husu nafatin ba família no viziñu sira keta deskrimina ita-nia maluk sira ne’ebé maka afeta moras lepra,” Ministra Élia apela.
Sekretariu Asuntu Sosiál munisípiu Manatuto, Natalino Carvalho, agradese ba inisiativa no tempu.
“Ha’u hato’o agradese ba Ministra Sosiál ho Ministra Saúde nia prezensa hodi haree diretamente ami-nia maluk difisiénsia sira ne’ebé mak afeta ba moras lepra iha munisípiu Manatuto,” nia dehan.
Vizita ba pasiente moras lepra sira ne’e iha fatin sira hanesan suku Cai-rui, Aiteas postu Manatuto Vila, aldeia Rembor, postu administrativu Laklo, suku Uma-kaduak, aldeia Ili-manu.
Jornalista : Arminda Fonseca
Editora : Julia Chatarina
