DILI, 27 juñu 2024 (TATOLI)—Komisaun D ne’ebé trata asuntu Ekonomia no Dezenvolvimentu iha Parlamentu Nasionál (PN), sei fó prioridade iha lejislatura daneen ne’e atu altera lei investimentu hodi regula ema estranjeiru hala’o atividade negósiu iha rai-laran.
Notísia Relevante: Membru PN husu Governu kontrola xineza halo atividade negosiu to’o munisipiu
“Ami kontaktu hela ho Ministériu Komérsiu no Indústria (MKI) ho Ministériu Koordenadór asuntu Ekonomiku (MKAE) atu haree lei investimentu, hodi regula estranjeiru sira hala’o atividade negósiu iha ita-nia rain,” Prezidente Komisaun D, Ricardo Baptista, hateten hodi responde Agênsia Tatoli, iha resintu Parlamentu Nasionál, kinta ne’e.
Nia dehan, relasiona xineza no negosiante estranjeiru sira seluk loke loza ka hala’o atividade negósiu tun to’o ba iha munisípiu ka área rurál sira, hanoin lei investimentu la bandu ida-ne’e no lei ne’e loke dalan atu sé de’it mak mai husi estranjeiru bele halo negósiu.
Preokupasaun sira-ne’e loos, karik asuntu ne’e importante bele haree oinsá mak ita atu regula negósiu ne’ebé ema estranjeiru sira loke, depois bele haree tanba labele taka dalan entaun fó fali impaktu ba Timor-Leste no loke luan ne’e ninia impaktu mós ba negosiante timoroan ne’ebé loke negósiu kiik sira-ne’e.
“Ida-ne’e mak ita sei haree. Ita mós hatene ita-nia nasaun ne’e adota hela merkadu livre, ne’ebé aleinde ema lori sasán husi fatin hotu-hotu mai faan iha Timor-Leste. Hanoin, ita-nia lei investimentu fó dalan ba estranjeiru bele mai ho kapitál kiik-oan rihun $50, sira bele loké sira-nia negósiu iha ita-nia rain,” nia hateten.
Tan ne’e, nia dehna, preokupasaun sira kona-ba estranjeiru sira hanesan xineza ho ema estranjeiru sira seluk mai iha Timor-Leste loké atividade negósiu hanesan ho timoroan ne’e, Komisaun toma nota hela.
Preokupasaun hanesan, nia hateten, parte Kámara Komérsiu Indústria Timor-Leste (CCI-TL, siglá portugés) mós hato’o ona preokupasaun ne’e iha PN oinsá atu tau atensaun.
Tan ne’e, Komisaun D ne’ebé haree kona-ba asuntu ekonomia sei tau prioridade diskusaun alterasaun ba lei investimentu, lei sosiedade komersiál, nune’e daudaun komunika hela ho Ministériu Komérsiu no Indústria (MKI) ho Ministériu Koordenadór asuntu Ekonomiku (MKAE) atu haree.
“Ami Komisaun agora haree hela lei lubun ida. Ne’ebé, kona-ba lei investimentu hanoin ona tenke haree. Se tinan ne’e la konsege, tinan oin buka tempu aselera prosesu sira-ne’ebé hanoin atu altera ou hamosu lei foun balun,” nia dehan.
Tanba, tuir nia, la kleuar tan PN sei tama ba resesu no iha 01 outubru ne’e, Governu sei aprezenta Orsamentu Jerál Estadu (OJE) 2025, nune’e iha tinan ne’e la konsege diskute alterasaun ba lei investimentu inklui lei sosiedade komersiál mak nafatin tau prioridade iha tinan oin hodi aselera diskusaun.
Jornalista : Nelson de Sousa
Editór : Cancio Ximenes
