DILI, 27 juñu 2024 (TATOLI)– Primeiru-Ministru, Kay Rala Xanana Gusmão, konfrima, Governu Timor-Leste simu ona informasaun husi Sekretariadu Organizasaun Nasaun Unida (ONU) katak Sekretáriu Jerál ONU, António Guterres konfirmadu partisipa komemorasaun loron konsulta populár ka referendum Timor-Leste nian ba da-25 ne’ebé sei komemora 30 Agostu tinan ne’e.
“Ha’u informa ba Xefe Estadu katak, Governu simu ona informasaun husi ONU katak Sekretáriu Jerál ONU António Guterres sei mai partisipa iha ita nia aniversáriu referendum ka loron konsulta populár iha 30 Agostu 1999 to’o 30 Agostu 2024, ne’ebé ita selebra ba tinan 25,” Xefe Governu informa ba jornalista sira iha Palásiu Prezidensiál Dili, hafoin ramata reuniaun semanál ho Prezidente Repúblika,José Ramos Horta.
Tanba ne’e, Xefe Estadu no Xefe Governu diskute liu kona-ba preparativu saida mak Governu presiza halo atu simu Sekretáriu Jerál ONU no atividade hotu iha aniversáriu referendu ne’e.
“Ami diskute liu kona-ba saida mak ita sei halo tanba iha 30 Agostu tinan ida ne’e ita selebra tinan 25 referedum,” Xefe Governu katak.
Tuir Xefe Governu, referedu importante tebes tanba ka’er tuir sakrifisiu avo sira, inan-aman sira, tiu ho tia ne’ebé mate iha funu laran, balun mate antes no depois referedu.
Nune’e, nia alerta ba ema hotu ne’ebé hetan oportunidade serbisu ba nasaun ne’e tenke sebisu ho fuan no laran hodi valoriza eroi sira ne’ebé fó ona vida hodi sosa independensia ne’e.
“Referedu ne’e ita bele dehan ita nia povu sosa indepedénsia ho ran no terus, tanba ne’e mak husu ba hotu-hotu ne’ebé serbisu atu serbisu ho laran. Serbisu ho transparánsia, serbisu ho di’ak tanba agora hetan karik kargu hanesan Deputadu, Ministru no instituisaun sira seluk la’ós atu simu osan de’it maibé simu responsabilidade bo’ot ida, atu fó saida mak ita bele dezenvolve rai ida ne’e no hadi’a povu tomak nia moris,” PM Xanana apela.
Selebrasaun loron referendum ba tinan ne’e importante ba povu hotu tanba povu hotu nia kontribuisaun mak deside Timor-Leste nia destinu iha tinan 1999.
Notisia relevante: Estadu TL konvida SekJer ONU mai partisipa komemorasaun tinan 25 konsulta populár
Jornalista: Hortencio Sanchez
Editór: Florencio Miranda Ximenes
