DILI, 28 juñu 2024 (TATOLI) – Ekipa Assa FC susesu iha nia jornada ikus faze grupu bainhira kontra adversáriu Atletico Mota-ain FC ho rezultadu 1-0, nune’e lidera kedan grupu B ho pontu sia, iha jogu kopa Federasaun Futeból Timor-Leste (FFTL) ne’ebé realiza iha Estádiu Munisipál Dili, sesta loraik ne’e.
Bainhira jogu la’o ekipa rua lansa kedan kontra no atake ba malu tuir tékniku no abilidade ekipa idaidak nian oinsa bele prodús lalais golu.
Assa ho ambisaun hakarak manán jogu ne’e, nune’e jogadór Assa nian hatudu jogu ne’ebé ho velosidade maka’as. Maibé atake hotu ne’ebé Assa halo sempre falla iha lina oin Mota-Ain nian tanba defeza Mota-Ain la fó fatin.
Mota-Ain mós iha ambisaun atu manán jogu ne’e maibé kontra atake hirak ne’ebé Mota-Ain halo nunka fó presaun ba Assa nune’e la rejulta golu.
Assa domina tebes jogu hahú kedan minutu jogu la’o to’o minutu klaran halo Mota-Ain book-aan susar, maibé sempre falla iha lina finalidade tanba defeza Mota-Ain metin tebes.
Nune’e minutu la’o to’o 40 laiha ekipa ida mak prodús tanba kada jogadór sempre defende nia ekipa ho atake no blokeia ne’ebé metin tebes.
Husi minutu 40 ba leten treinadór Assa tenta halo mudansa jogu iha lina klaran no finalidade. Ikus mudansa ne’e la hela de’it hanesan mudansa tanba iha minutu 45+1 jogadór Martinho Belo konsege lees duni rede Mota-Ain hodi muda rezultadu ba 1-0, bainhira jogadór ne’e prodús golu minutu mós termina kedan nune’e Assa provijoriu lidera jogu.
Hakur ba segunda parte ekipa rua kontinua lansa kontra no atake ne’ebé másimu ba malu. Mota-Ain iha ambisaun ne’ebé maka’as atu halo empata jogu ne’e nune’e bele fahe pontu ba malu.
Maibé esforsu hotu ne’ebé Mota-Ain halo hela de’it hanesan esforsu tanba nunka prodús golu hodi halo empata jogu ne’e. Nune’e to’o minutu jogu termina vitoria hela ba Assa hodi avansa ba oitavu finál no Mota-Ain tenke elemina husi kopa FFTL tanba pontu la to’o.
Nune’e iha grupu B Assa ho Mushila mak ultrapasa ba oitavu finál, Assa ho pontu sia, Mushila neen. Enkuantu Mota-Ain rekolla de’it pontu tolu no FC Rai Klaran nunka rekolla pontu.
Nune’e grupu B Assa sei ba kontra ekipa rua husi grupu A DIT FC iha oitavu finál no Mushila kontra Relay FC iha semana oin mai.
Notísia relevante:Gregorio husu klube 16 kompete iha kopa FFTL 2024 joga ho dixiplina
Jornalista: Hortencio Sanchez
Editór; Florencio Miranda Ximenes
