DILI, 04 abríl 2024 (TATOLI)–Federasaun Futeból Timor-Leste (FFTL), sábadu ne’e, realiza ekontru tékniku ho klube futebol hamutuk 16 ne’ebé konfirmadu ona atu kompete iha kopa FFTL 2024 ne’ebé sei halo aberutura iha 10 maiu.
Notísia Relevante: 10 Maiu, Klube futeból 16 partisipa abertura kopa FFTL
Sekretariu Jerál FFTL, Grigorio Correia, husu ba klube futeból sira bainhira joga tenke joga ho dixiplina, tanba loloos ne´e klube sira primeira divizaun no segunda divizaun Liga Futeból Timor-Leste (LFTL) mak mai kompete, maibé sira barak la mai entaun FFTL loke ba públiku.
“Ohin, ita-boot sira mai partisipa iha reuniaun ida-ne’e hanesan parte tékniku nian hakarak hateten katak imi sira-ne’e paixaun duni ba futeból, entaun bainhira kompetisaun la’o ona tenke hatudu diziplina durante jogu. Desizaun saida mak iha la satisfás halo karta hatama ba komisaun la’ós halo problema iha kampu laran ida-ne’e la fó solusaun mai ita,” Sekretariu Jerál FFTL ne’e hateten ba jornalista sira, iha Salaun Xanana Sport Centre Bairro dos Grilhos.
Nia dehan, iha jogu ne’e atu promove mós jogadór sira-nia talentu oinsá mak bele ultrapasa ba selesaun nasionál hodi reprezenta Timor-Leste ba jogu internasionál sira no jogu ne’e bainhira la’o mak FFTL sei halo selesaun ba jogadór sira-ne’ebé iha talentu di’ak.
“Iha jogu ida-ne’e ekipa hotu hakarak manán, maibé ida-ne’e fila-fali treinadór no jogadór sira. Servisu makaas mak sei manán. Servisu la makaas mak sei la manán, maibé hatudu nafatin jogu ne’ebé di’ak, lakon ho dignidade no manán mós ho dignidade,” nia dehan.
Iha fatin hanesan, Diretór Kompetisaun Futeból Profisionál FFTL, Frederico Martins, reforsa tan katak jogu ne’e realiza durante fulan tolu nia laran ne´ebé sei hahú iha 10 maiu 2024 no sei termina iha 28 jullu 2024.
“Jogu ne’e la’o ho tempu ne’ebé mak to’o fulan tolu. Kada jogu iha semana mak hahú sesta to’o domingu. Jogu hotu ita hala’o iha Estádiu Munisipál Dili tanba koordena ona ho Ministeriu Juventude, Desportu, Arte no Kultura (MJDAK),” Frederico hateten.
Iha sorin seluk, treinadór klube Assa FC, Francisco Araújo, hateten ekipa preparadu atu kompete iha kopa FFTL 2024 ne´e no garante sei hatudu jogu ne’ebé di’ak hodi hetan vitória.
“Ami-nia preparasaun la’o di’ak tebe. Jogadór nia kondisaun hotu-hotu di’ak, iha kompetisaun mak ita haree no durante jogu menutu 90 mak sei termina,” nia dehan.
Nia dehan, Assa hanesan klube ida-ne’ebé foin mak dahuluk kompete iha kompetisaun FFTL nian no esforsu atu hatudu rezultadu di’ak.
Entretantu, durante enkontru tékniku iha mós dada sorteiu ba ekipa 16 hodi fahe ba grupu haat mak grupu A-D ho rezultadu kada grupu akumula klube haat (4) mak hanesan;
Grupu A
- DIT FC.
- Relay FC
- Nature FC
- AS Cantada
Grupu B
- Mushila FC
- Assa FC
- ATL Mota-Ain
- Rai-Klaran FC
Grupu C
- FIEL FC
- Zhavia FC
- Maubale FC
- FC Iraler
Grupu D
- Lica-Lica FC
- São José FC
- B2B FC
- FC Ostico
Iha jogu ne’e, FFTL prepara ona premiu ba manán-na’in sira mak klupe ne’ebé hetan primeiru lugar ne´e sei hetan osan $15.000, segundu lugar $10.000, terseiru lugar $7,500 no kuartu lugar $5,000.
Jornalista : Hortencio Sanchez
Editór : Cancio Ximenes
