DILI, 28 juñu 2024 (TATOLI) – Timor Gap no Autoridade Munisípiu Dili (AMD), organiza, ohin, atividade kuda akásia oan hun 150 iha aldeia Terra Santa, Dili.
Prezidente Timor Gap, Rui Soares, informa atividade kuda ai-oan ne’e hola parte iha atividade ba preparasaun ba aniversáriu ezisténsia Timor Gap nian ba da-13.
“Ohin ami hamutuk ho AMD kuda akásia oan 150 iha aldeia Terra Santa ho objetivu hakarak hamoris filafali prezensa akásia iha Dili”, Rui Soares dehan hafoin atividade kuda ai ne’e.
Nia salienta akásia oan ne’ebé sira kuda ne’e hetan apoiu husi Diresaun Floresta husi Ministériu Agrikultura, Pekuária, Peska no Floresta (MAPPF). “Ba oin ami sei koordena ho Grupu Defeza Ambiente atu kuidadu durante tinan rua. Ita-nia parte nafatin halo monitorizasaun, nune’e bele hatudu rezultadu di’ak”, nia asegura.
Iha fatin hanesan, Prezidente Autoridade Munisípiu Dili, Gregório Saldanha, apresia inisiativa husi Timor Gap hodi konvida AMD bá partisipa kuda ai oan ne’e importante, tanba bainhira kuda hotu presiza kuidadu di’ak no sei halo Dili, liuliu área Terra Santa sai furak.
“Akásia sai ona ita-nia ikon, tanba tempu uluk Dili nakonu ho akásia no ikus mai lakon. Agora, ita iha inisiativa kuda fali, ida ne’e vantajen boot ba ita”, nia dehan.
Nia sujere katak atividade kuda ai ne’e labele husi Timor Gap de’it, maibé parte hotu-hotu bele kuda hodi haburas fala sidade Dili.
Xefe Bairru da Pás BTN II, aldeia Terra Santa, suku Madohi, postu administrativu Don Aleixo, Marcelina da Silva, satisfeita no agradase tebes ba Timor Gap ne’ebé eskolla sira-nia fatin hodi kuda ai ne’e.
“Tanba akásia oan ne’ebé ohin kuda ona iha Terra Santa ne’e iha futuru sira ne’e moris hotu sei fó buras ba ami. Espera atividade sira ne’e kontinua nafatin hodi haburas sidade Dili”, realsa.
Jornalista: Arminda Fonseca
Editora: Maria Auxiliadora
