DILI, 29 juñu 2024 (TATOLI)— Arsebispu Arkidioseze Metropolitana Dili, Don Virgílio Kardeál do Carmo da Silva, SDB, dader ne’e lansa direita atividade serbisu voluntáriu “Hadomi no Servi” ne’ebé selesionadu ona husi Igreja Katólika Timor-Leste ho meiu rejistu online ba ema nain 1.000.
Prosesu rejistrasaun rasik loke ona ba publiku iha 07 juñu 2024 ho meiu online hodi rekruta pessoal potensíal ba serbisu voluntáriu “Hadomi no Servi” ba preparasaun vizita Amu Papa Francisco mai vizita Timor-Leste iha loron 09 to’o 11 setembru tinan 2024.
“Agradese ba ita boot sira nia prontidaun no disponibilidade tanba iha rejistu 3.000 maibe labele simu hotu no selesiona ema 1.000, imi lubuk ida ne’ebé hatan ona lori igreja nia naran agradese ba ita bo’ot sira nia disponibilidade ne’e,” Dom Virgílio dehan iha Salaun DIT, Aimutin, sábadu ne’e.
Arsebispu Metropolitanu Dili ne’e mós hato’o agradese ba Universidade Dili Institute of Technology (DIT) ne’ebé oferese ona salaun ba igreja ho gratuitamente atu bele fasilita enkontru dahuluk ekipa voluntáriu igreja nian.
Notisia relevante : Ohin, igreja lansa rejistu “online” ba serbisu “Voluntáriu Hadomi no Servi”
Fernando Van Nahak, Voluntáriu husi Parokia São José Aimutin Comoro hato’o sentimentu agradese no espera liu husi atividade voluntáriu bele hasae ninia koñesimentu no hanesan joven nafatin esforsu, hatudu badinas, kreatividade no inovasaun ne’ebé bele kontribui ba nasaun liu-liu ba momentu vizita Papa Francisco mai Timor-Leste.
“Ha’u la espera ha’u nia naran bele sai iha selesaun ida ne’e no ha’u kontente tebes tanba ne’e hanesan previleziu boot ida mai ha’u. Mensajen ba maluk joven sira keta moe hala’o serbisu voluntáriu maske la hetan lukru maibe sei hetan matenek no siensia husi maluk sira,” Fernando dehan.
Iha fatin hanesan, Irmaun Nico Lay hanesan Visé Kordenador Jerál Ekipa Voluntáriu ba “Hadomi no Servi” hateten iha sorumutu dahuluk ne’e hanesan faze koñesimentu entre partisipante idak-idak inklui hodi bele fahe partisipante sira ba grupu 20 ho nia lidér grupu nain rua.
“Kada grupu iha ema nain 50 no nia lidér grupu nain-rua. Tanba saida ita halo hanesan ne’e, hodi hafasil atu kontrola sira idak-idak nune’e mós hafoin ida ne’e sei iha formasaun ba sira konaba lideransa,” nia esplika.
Nico Lay fo hanoin hikas ba voluntáriu sira atu nafatin hametin kolaborasaun nune’e bele realiza serbisu sira ho di’ak tanba ema barak mak hakarak hetan oportunidade atu serbí Maromak liu husi hala’o serbisu voluntáriu.
Jornalista : Cidalia Fátima
Editora : Armandina Moniz
