Hand tractor neen iha Aileu avaria
DILI, 01 Jullu 2024 (TATOLI) – Servisu Agrikultura munisípiu Aileu rejista hand tractor neen mak avaria ona, tanba ne’e presiza ekipamentu foun atu tulun sira hodi fila agrikultór sira-nia natar.
Xefe Departamentu Estensionista, António de Jesus, admite katak sira hasoru dezafiu iha terrenu hodi fila rai tanba laiha ekipamentu atu ajuda sira.
“Ami iha Aileu agora hasoru problema tanba hand tractor neen ne’ebé ami simu iha Governu anteriór, iha eis-Ministru Mariano Assanami Sabino nia tempu, agora avaria hotu ona, ami presiza hetan lalais tratór foun ida atu fila natar”, António de Jesus dehan via telefone, ohin.
Ba hand tractor neen ne’ebé avaria ne’e, Agrikultura Aileu informa ona ba nasionál no daudaun ne’e parte tékniku sira haree ona hodi halo manutensaun.
“Prosesu manutensaun sei la’o hela. Espera katak ho apoiu tékniku nian bele hetan solusaun ida di’ak atu hakmaan serbisu agrikultór sira-nia iha natar laran”, salienta.
Dirijente ne’e afirma katak tratór unidade 25 ne’ebé Ministériu Agrikultura, Pekuária, Peska no Floresta (MAPPF) sosa iha tinan kotuk no distribui ne’e, Aileu seidauk hetan ida.
Iha sorin seluk, Diretór-Jerál Agrikultura, Kafé no Planta Industriál, Martinho Laurentino Soares, haktuir distribuisaun tratór unidade 25 ne’ebé sosa iha tinan kotuk ne’e, MAPPF disponibiliza ba munisípiu potensiál sira hodi kuda hare ho volume ne’ebé boot.
Nia promete katak, ba munisípiu Aileu, sei hetan apoiu tratór ida iha faze daruak, tanba daudaun ne’e sira iha de’it natar ektare 300.
Ho problema ne’ebé grupu agrikultór sira enfrenta ne’e, ekipa téknika sira halo ona intervensaun hodi hadi’a ekipamentu sira ne’e atu ajuda hodi aselera serbisu agrikultór sira-nian iha baze ba hasa’e produsaun hare iha Aileu.
“Ami promete ona ba sira katak iha faze daruak ne’e ami sei apoia tratór ida ba sira, tanba agora ami foku lai ba rai potensiál sira ho volume ektare ne’ebé boot”, realsa.
Iha planu 2024 nian, MAPPF sei sosa tan tratór unidade 25 no hand tractor 200 no mini tiller 50.
Notísia relevante: Tékniku hosi nasionál hadi’a ona tratór 14 iha Agrikultura Baucau
Jornalista: Tomé Amado
Editora: Maria Auxiliadora
