DILI, 01 jullu 2024 (TATOLI) – Organizasaun tolu hanesan Programa Dezenvolvimentu Futuru (PDF), Asosiasaun Patrimóniu Kulturál Timor-Leste (APCTL) no Asosiasaun Misaun Antigu Kombatente Timor-Leste (AMATL) halo voluntariamente limpeza jerál kada loron iha Dili.
Prezidente Asosiasaun Munisípiu Dili, Romaldo Ribeiro, hateten objetivu sira serbisu voluntáriu halo limpeza iha kapitál ne’e, tanba hakarak apoia polítika Governu nian liuhusi Autoridade Munisípiu Dili (AMD), ne’ebé hakarak organiza Dili sai moos no furak.
“Atividade limpeza jerál ne’ebé ami halo ne’e hahú husi segunda to’o sesta iha kapitál. Ami halo ho voluntáriu de’it oinsá apoia ita-nia Governu nia planu halo Dili sai moos no furak”, Romaldo Ribeiro dehan ba Tatoli, iha Kampung Baru, ohin.
Nia salienta atividade ne’ebé sira halo ne’e importante tebes, tanba Dili atu sai sidade moos ne’e la’ós parte Governu nia responsabilidade de’it, maibé ema hotu nia responsabilidade.
“Atividade ne’ebé ami halo hahú iha fulan-Abríl to’o mai agora no sei kontinua nafatin, tanba Dili atu sai moos ita hotu nia responsabilidade, liuliu ita mós agora prepara aan atu tama ba Asosiasaun Nasaun Sudeste Aziátiku [ASEAN, sigla inglés], ita mós tenke apoia ita-nia Governu liuhusi atividade ki’ik sira ne’e”, nia adehan.
Difikuldade ne’ebé sira hasoru mak ekipamentu ba limpeza hanesan ai-suak, ai-saar no karreta ajuda foti fo’er mak laiha, entaun sira hamoos fo’er uza de’it saida mak sira iha.
“Ami husu ba parte hotu karik bele apoia ami ho ekipamentu ne’ebé bele uza hodi halo limpeza, tanba ami falta ekipmentu no karik bele munisípiu Dili apoia ho karreta nune’e foer ne’ebé ami hamoos tula sai tanba durante ne’e ami sunu de’it”, nia sujere.
Asosiasaun tolu ne’e daudaun iha membru hamutuk 60, ne’ebé maihusi feto-faluk, katuas, ferik no joven sira ne’ebé la eskola.
Romaldo Ribeiro hato’o mensajen ba joven sira ne’ebé laiha serbisu no la eskola bele bá hamutuk ho sira hodi kontribui ba nasaun, liuhusi atividade ki’ik sira hanesan limpeza jerál.
“Atu kontribui ba ita-nia nasaun ne’e la’ós tenke serbisu iha edifísiu ka kaer kargu ruma, maibé liuhusi limpeza ka hamoos fo’er ne’e mós kontribui ona ba ita-nia Estadu”, nia salienta.
Iha sorin seluk, Prezidente Autoridade munisípiu Dili, Gregório Saldanha, agradese ba grupu sira ne’ebé iha inisiativa hodi tulun Governu ho forma voluntáriu halo limpeza jerál iha kapitál.
“Ba oin la’ós de’it asosiasaun tolu ne’e mak halo atividade voluntária, maibé presiza aumenta tanba sidade Dili atu sai furak no moos ne’e la’ós AMD ka Governu nian responsabilidade de’it maibé ema hotu nian”, dehan.
Ho preokupasaun sira ne’ebé asosiasaun tolu ne’e hasoru maka PAM Dili garante katak ba oin nia parte ho ekipa sei buka dalan tulun sira no kona-ba foti fo’er sira, PAM husu ba asosiasaun ne’e bainhira limpeza hotu, fo’er sira tau iha dalan-ninin nune’e karreta lixu bele foti.
Notísia relevante: Dezde abríl lixu iha kapitál Dili hahú menus
Jornalista: Arminda Fonseca
Editora: Maria Auxiliadora
