DILI, 02 jullu 2024 (TATOLI)-Diretór Ezekutivu, Fundu Dezenvolvimentu Kapitál Umanu (FDCH-sigla portugués), Júlio Aparício hateten bolseiru timoroan hamutuk ema 16 sei bá estuda iha Institutu Polítekniku Saúde (Politeknik Kesehatan) Indonézia hodi hasai lisensiatura (S1)iha área enfermajén anesteziolojia.
“Iha ne’ebá ne’e ema hahú aula iha fulan-jullu, entaun semana oin sira bá ona Indonézia, hodi hala’o sira-nia estudu iha POLTEKKES KEMENKES, ba nível lisensiatura nian,” Júlio Aparício, hateten ba TATOLI, iha Colmera Dili, tersa ne’e.
Nia esplika bainhira FDCH anúnsia vaga ne’e ba publiku, ema hamutuk 107 maka konkore, no sira ne’ebé maka liu selesaun dokumentus hamutuk 50, depois tuir teste eskrita kandidatu 19 mak aprovadu, maibé na’in 16 tenke avansa uluk no na’in tolu hanesan suplemente.
“Ministériu Saúde dehan katak ida ne’e primeira vez governu fó bolsa ba timoroan sira iha área enfermajen anestézia, entaun ne’e oportunidade ida ne’ebé di’ak tebes,” nia salienta.
Ekipa juri hosi Institutu POLTEKKES KEMENKES Indonézia maka fó teste ba kandidatu sira ne’e, tanba hetan kooperasaun servisu entre INAP, FDCH no Ministériu Saúde (MS).
Tanba ne’e, antes bolseiru sira ne’e atu desloka bá indonézia iha tempu badak, nia esplika, iha loron 27 fulan-juñu liubá, ekipa FDCH kompostu husi Diretór Ezekutivu Interinu, Rogerio Miranda Lay, Asesora Bolsa Estudu, Márcia Aparício, no Asesór Jurídiku FDCH, Tomas Nunes, tékniku FDCH , hamutuk ho ekipa Ministeriu Saúde asina ona karta aseitasaun ho inan-aman bolseiru na’in 16.
“Asina karta aseitasaun hodi simu estatutu hanesan bolseiru no liuhusi ne’e hodi hatudu sira-nia komprimisiu ho MS no FDCH, nune’e simu ona aseitasaun ba bolsa estudu ida ne’ebé governu atribui liuhusi MS no hetan finansiamentu husi FDCH,” nia informa.
Iha sorumutu ne’e, nia relata tan parte governu apela ba bolseiru sira atu aproveita programa bolsa estudu ne’e tanba tuir akordu benefisiáriu sira tenke remata sira-nia estudu durante tinan haat nia laran.
“Husu ba ha’u-nia alin sira, atu imi kumpre regra Institutu Politéniku saúde POLTEKKES KEMENKES no labele kontra ema nia regras sira. Tanba oportunidade ne’e dala ida de’it, ema hotu hein oportunidade ida-ne’e, maibé ita-boot sira mak nu’udar méritu ida, tan ne’e keta halakon konfiansa parte rua ne’e nian inklui mós inan-aman sira, ba ita-boot sira-nia estudu iha futuru,” nia tenik.
Jornalista : Osória Marques
Editór : Agapito dos Santos
