DILI, 02 jullu 2024 (TATOLI)— Durante fulan-abríl to’o maiu, Ministériu Saúde (MS) liuhusi Diresaun Nasionál Servisu Médiku no Ambulánsia Nasionál Emerjénsia (SNAEM.IP) evakua ona pasiente hamutuk 2.612 husi Sentru Saúde mai Ospitál Nasionál Guido Valadares (HNGV), hodi hala’o tratamentu saúde.
“Ha’u hakarak atualiza fila-fali, iha ambulánsia terrestre hamutuk 23 ne’ebé oras ne’e funsiona hela, ambulánsia ró ida ne’ebé evakua pasiente sira husi Atauro ba Dili no ró ne’e hetan apoiu husi Indonézia, ne’ebé hala’o ona operasaun durante tinan rua ona, no sei iha hela kondisaun di’ak, no ambulánsia vou ida, iha ne’ebé Ministériu Saúde asina ona MoU ho Austrália atu evakua pasiente sira, no mezmu ida ne’e la’ós gratuita; ita selu nafati. Entaun, ambulánsia husi terrestre, vou no marítima evakua ona pasiente hamutuk 2.612,” Diretór SNAEM, Simplicio Amaral ba TATOLI iha nia eskritóriu Caicoli, Dili, ohin.
Diretór Simplicio informa, to’o agora iha ona ambulánsia terrestre, hamutuk 23 ne’ebé hala’o operasaun iha evakuasaun pasiente sira husi sentru saúde munisípiu mai HNGV hodi halo tratamentu saúde ho kazu emerjénsia sira.
“Durante fulan rua liubá ambulánsia evakua ona pasiente hamutuk 2.612, númeru ne’e la inklui fulan-juñu, tanba autoridade sira iha munisípiu seidauk haruka sira-nia relatóriu, se relatóriu haruka ona bele to’o pasiente hamutuk 4.000 inklui RAEOA,” nia hateten.
Ezekutivu ne’e relata, tuir relatóriu ne’ebé hetan kada semana, ambulánsia evakua pasiente barak liu ho kazu inan isin-rua no trauma.
“Iha Munisípiu Baucau, mak durante evakua pasiente barak liu, no ida ne’e klasifika liu hanesan kazu trauma, ne’ebé labele halo tratamentu iha ospitál rejionál tanba ekipamentu médiku no sasán medikamentu la adekuadu, nune’e sira evakua ba iha HNGV,” nia afirma.
Autoridade másima SNAEM ne’e haktuir, ospitál sira ne’ebé evakua pasiente barak liu ba HNGV, mak Maubisse, Maliana no Suai.
“Alende ida-ne’e, SNAEM mós iha planu atu sosa ambulánsia foun lima kada tinan, no tinan ida-ne’e sosa ambulánsia lima husi Tailándia ne’ebé agora daudaun iha hela prosesu entrega nian,” nia hatete.
Ambulánsia ne’e sosa liuhosi konkursu públiku ho orsamentu rihun $300 no sei to’o iha Timor Leste maizumenus fulan-agostu no sei fahe ba munisípiu haat hafoin utiliza durante vizita Papa Francisco mai Timor-Leste.
Notísia relevante:SNAEM planea sosa ambulánsia distribui ba fasilidade saúde sira
Jornalista : Felicidade Ximenes
Editór: Rafael Ximenes de A. Belo
