Top

KHUNTO husu Governu tau atensaun aldeia neen iha Lautém seidauk asesu eletrisidade

Ekipa téknika EDTL, E.P ko’a kotu fiu no hadi’a hela eletrisidade iha área Pasar Senggol-Bidau, kuarta (16/04/2024). Imajen/Tatoli

DILI, 02 julllu 2024 (TATOLI)—Deputadu KHUNTO iha Parlamentu Nasionál (PN), Luis Roberto da Silva, husu ba Governu liuhusi ministériu kompetente atu tau atensaun ba komunidade iha aldeia neen (6) iha postu administrativu Lautém, munisípiu Lautém ne’ebé to’o agora seidauk asesu eletrisidade.

 Notísia Relevante: MOP planeia halo dijitalizasaun ba eletrisidade iha tinan oin

“Ukun-aan ida ne´e, suku no aldeia balun seidauk sente ukun-aan ho kompletamente. Aldeia neen (6) husi suku Maina 2, Maina 1, postu Lautém, munisípiu Lautem (Zona Alto Laleno) nian, ne’ebé mós uluk sai baze ba gerrileiru sira, maibé infelizmente populasaun aldeia neen iha fatin refere kalan sei sunu kamii no ahí tradisionál sira seluk tanba Governu seidauk instala enérjia eletrisidade,” nia hato’o iha reuniaun plenária Parlamentu, tersa ne’e.

Iha 2015 liu ba, nia dehan, autoridade lokál hamutuk ho veteranu sira submete ona proposta ba Ministériu Obra Públika no Vise Ministru Eletrisidade no Saneamento, iha tinan 2018 kompaña mobiliza ona materiál balun hanesan ai-riin maibé to’o momentu ida-ne´e seidauk iha serteza.

“ita lahatene, bainhira lo’os mak atu instala enérjia eletrisidade ba populasaun sira iha aldeia neen refere no ita ladauk haree iha lista projetu anteriór nian,” nia dehan.

Tanba ne´e, nia husu ba ministériu relevante atu aseleira ona prosesu sira atu komunidade bele asesu ona eletrisidade hanesan ho suku sira seluk, nune´e mós kompañia ne’ebé mobiliza ona matérial balun labele sai fali vítima.

Deputadu CNRT, Anacleto Freitas, levanta preokupasaun kondisaun enfraestrutura estrada iha munisípiu Viqueque ba postu Uatulari no Uatucarabau hodi hato’o ba ministériu kompetente, atu nune’e ateru tiha hodi nune’e fasilita movimentasaun i komunidade iha iha fatin ne’eba.

Nia mós levanta kondisaun estrada Viqueque liga ba postu Lacluta grave tebes, tanba ne’e nu’udar reprezentante povu ne’ebé tuur iha uma fukun PN husu ba Institutu Jestaun Ekipamentu Apoiu Dezenvolvimentu Enfraestrutura Institutu Públiku (IGEADE, I.P) atu halo mós ateru ba dalan refere.

Entertantu, iha reuniaun plenária segunda-tersa ne’e reprezentante povu iha uma fukun Parlamentu sempre levanta preokupasaun iha faze relasiona ho enfraestrutura báziku hanesan estrada, bee-moos no seluk tan hodi husu ezekutivu atu tau atensaun.

Iha reuniaun plenária ne’e, reprezentante Governu liuhusi Vise-Ministru ba asuntu Parlamentár, Adérito Hugo da Costa la marka prezensa, nune’e parte tékniku sira rejista de’it preokupasaun Deputadu sira-nian hodi bele hato’o ba ministériu tutela hodi tau atensaun.

Jornalista : Nelson de Sousa

Editór        : Cancio Ximens

Publisidade

Leave a Reply

Latest Post

error: Content is protected !!