DILI, 02 Jullu 2024 (TATOLI) – Estensionista na’in-15 ne’ebé koloka iha Servisu Agrikultura Liquiçá, hela de’it na’in-haat mak ativu. Tanba ne’e, presiza tékniku foun na’in-20 atu reforsa serbisu agríkola iha suku 24.
Diretór Servisu Agrikultura Liquiçá, José Pereira, dehan pesoál na’in-haat ne’ebé sei ativu daudaun fó asisténsia agríkola ba to’os-na’in iha suku 12 oinsá bele hasa’e sira-nia produtu iha natar no to’os laran.
“Tékniku na’in-haat ne’e ita konsidera sei iha idade produtiva. Tanba ne’e, sira sei iha forsa atu serbisu hodi ajuda ita-nia inan-aman sira ne’ebé serbisu iha natar no to’os”, diretór realsa iha Comoro, ohin.
Nia haktuir katak iha ekipa téknika na’in-11 maka tama ona idade avansada, sira ne’e entre 57 no 60. Pesoál sira ne’e barak maka agora muda ona bá nasionál tanba labele halo serbisu iha baze. Ne’e duni, suku 23 ne’ebé eziste iha Liquiçá ne’e, 11 mak laiha estensionista.
“Ami preokupa tebes, tanba ne’e ami submete ona pedidu ba Diresaun Nasionál Estensaun no Formasaun Agríkola atu tau konsiderasaun ba serbisu tékniku sira iha ami-nia munisípiu hodi bele apoia tan pesoál na’in-20 atu reforsa serbisu sira iha baze”, salienta.
Nia dehan ezijénsia ne’ebé sira hato’o ba Ministériu Agrikultura, liuhusi Diresaun Nasionál Estensaun no Formasaun Agríkola ne’e tanba ministériu iha ona planu atu halo rekrutamentu ba estensionista hamutuk 155 hodi apoia serbisu agríkola iha suku sira iha territóriu.
Diretór Nasionál Estensaun no Formasaun Agríkola, Januário Marcal, admite katak ministériu iha ona planu atu halo rekrutamentu hodi koloka estensionista sira bá munisípiu sira. Planu rekrutamentu ne’e sei halo hodi responde ba difikuldade sira iha baze, liuliu ajuda agrikultór sira oinsá bele iha koñesimentu tékniku atu kuda no hasa’e produsaun iha rai-laran.
“Tanba iha ona ekipa téknika barak maka nia kondisaun fízika la permite ona atu kontinua serbisu iha baze”, realsa.
Antes ne’e, ministériu rekruta, iha 2008 no 2009, estensionista na’in-376, maibé daudaun ne’e hela de’it na’in-317 maka sei ativu serbisu no 59 moras, balun mate no barak maka idade avansada ona.
Ho preokupasaun husi munisípiu sira nian kona-ba falta ekipa tékniku ne’e, ministériu tau nafatin iha konsiderasaun no sei prepara nia prosesu hotu, nune’e bele responde ba iha tinan oin.
Notísia relevante: Agrikultór Aileu husu atu aumenta estensionista na’in-21
Jornalista: Tomé Amado
Editora: Maria Auxiliadora
