Alfándega rekolla reseita millaun $45 iha semestre dahuluk
DILI, 03 jullu 2024 (TATOLI) – Autoridade Aduaneira (AA/Alfándega) arrekada, entre Janeiru no Juñu, reseita hamutuk millaun $45 ba konfre Estadu, informa Diretór Nasionál Jestaun Konformidade Alfándega, Ivo Gomes.
Nia hateten reseita ne’ebé Alfándega rekolla ne’e mai husi taxa ba impostu sobre venda, seletivu konsumu no seluk tan.
“Reseita ne’ebé rekolla tantu husi Dili, fronteira terrestre tomak no reseita sira ne’e, barak liu mai husi Portu Tíbar, tuirmai fronteira Batugadé no Suai [Mota-Masin]”, nia adianta.
Iha bibán ne’e, nia mós husu ba públiku katak selu taxa ba importasaun nian tantu portu Tíbar komu fronteira terrestre sira hanesan de’it.
“Taxa ba Portu Tíbar ne’e bazeia ba rejime tarifáriu ne’ebé Governu halo fó ba kompañia Bolloré hodi ezekuta, tanba Portu Tíbar ne’e rasik avansadu liu kompara ho fronteira sira, maibé taxa nafatin 5% bazeia ba Lei Tributária”, esplika.
Lembra katak, iha tinan kotuk, hahú husi 01 janeiru to’o 31 dezembru 2023, Alfándega arrekada reseita hamutuk $103.298.640,22 ba konfre Estadu.
Rekorde mós katak Governu introdús impostu seletivu konsumu foun ne’ebé inklui 10% impostu ba karreta ho valór liu rihun $10, 20% ba karreta ho valór liu rihun $25, 30% ba karreta ho valór liu rihun $50. Aumentu iha impostu konsumu ba tabaku no produtu tabaku seluk husi $50 kada kilógrama sa’e ba $100, impostu konsumu foun $1 kada kilógrama ba masimidar no introdusaun impostu konsumu foun ho valór $3 kada litru ba bebida midar (fanta coca-cola sunkist, sprite no seluk tan), ne’ebė politika ida-ne e Governu trasa atu proteje sidadaun nia saúde.
Aleinde ne’e, Govemu mós hasa’e impostu ba importasaun husi 2,5% ba 5%, ne’ebé ho introdusaun impostu hirak ne’e tuir projesaun reseita doméstika sa’e to’o millaun $174,9 iha tinan 2023. Introdusaun impostu hirak ne’e mós hodi hasa’e kolesaun reseita minerál nu’udar instrumentu fiskál ne’ebé Govemu uza hodi redús dependénsia ba fundu minarai.
Notísia relevante: Alfándega hatama reseita millaun $21-resin iha fulan-tolu
Jornalista: Arminda Fonseca
Editora: Maria Auxiliadora
