iklan

MUNISÍPIU, VIQUEQUE

PAM Viqueque ho SEATOU estabelese ekipa muda vendedór bá merkadu Olobai

PAM Viqueque ho SEATOU estabelese ekipa muda vendedór bá merkadu Olobai

PAM Viqueque ho SEATOU forma ekipa muda vendedór ba merkadu Olobai iha suku Caraubalu, postu Viqueque Vila.Imajén Tatoli/Vitorino Lopes da Costa.

VIQUEQUE, 03 jullu 2024 (TATOLI)- Prezidente Autoridade Munisípiu Viqueque (PAM) ho Ekipa Sekretáriu Estadu Asuntu Toponomia  no Organizasaun Urbana (SEATOU), kuarta ne’e, forma ona  ekipa konjunta ida hodi prepara kondisaun hodi muda vendedór sira-ne’ebé faan sasán iha merkadu ántiga bá merkadu foun Olobai iha suku Caraubalu, Postu Viqueque Vila.

Ekipa ne’e lidera husi PAM  no envolve Diresaun Ministériu Komérsiu no Indústria (MKI), Eletrisidade de Timor Leste, Empreza Públika (EDTL,E.P), Bee Timor Leste, Empreza Públika (BTL,E.P), Servisu Obra Públika (SOP), Diresaun Jestaun Merkadu munisipál (DJMM), Autoridade Protesaun Sivil (APC, sigla portugés), Polísia Nasionál Timor Leste (PNTL), Diresaun Terra Propriedade (DTP) no autoridade lokál sira.

Objetivu forma ekipa ida-ne’e hodi prepara kondisaun sira hanesan bee-moos, sameantu, eletrisidade, Estrada no seguransa, atu nune’e muda vendedór sira bá merkadu Olobai karik fatin dignu ona ba sira.

“Tanba ne’e, ami mai hodi apoia PAM forma ekipa konjunta  ida-ne’e ita tau forsa hamutuk hodi hadi’a kondisaun sira hanesan sentina públiku, ahi-eletrisidade, Estrada, bee-moos,  kondisaun sira-ne’e maka ekipa ne’ebé forma ona ne’e tau ba atensaun. Ekipa ida-ne’e modelu mós hanesan ami forma iha Dili mak implementa mós iha munisípiu Viqueque”, Diretór Nasionál Ijiene no Orden Públiku husi SEATOU, Egas José Caetano, hateten ba jornalista sira  hafoin ramata forma ekipa konjuta, iha salaun administrasaun munisípiu Viqueque, ohin.

Ekipa konjuta ida-ne’e fasil atu identifika no organiza, nune’e ba oin ekipa sei deskute hodi rezolve no kompleta kondisaun minimu sira-ne’ebé iha merkadu Olobai.

“Ami-nia parte SEATOU prontu fó apoiu asisténsia ba ekipa konjuta munisípiu Viqueque hodi muda vendedór sira ba merkadu Olobai, maibé ita hein bainhira maka ekipa sira rezolve kondisaun, hafoin ita muda vendedór sira”, nia hato’o.

Iha fatin hanesan,  Diretór Nasionál Komersiu Interna husi MKI, Gabriel da Costa,  husu ekipa konjuta husi liña ministeriál servisu hamutuk hodi fó hanoin ba malu atu hadi’a kondisaun merkadu Olobai, nune’e bele muda vendedór sira ho dignu.

“Merkadu Olobai konstrui tinan barak, maibé la utiliza entaun animál sira maka nakonu tanba liuhusi ekipa ida-ne’e ba oin ita bele rezolve hamutuk, atu uza fila fali fasilidade sira-ne’ebé ita hari’i”,  nia sujere.

Kria kondisaun mak muda vendedór

Entretantu, PAM Viqueque, Francisco C.S de Gonzaga Soares, haktuir ekipa konjuta ne’ebé forma ona ne’e atu  hadi’a munisípiu Viqueque no ekipa sira sei esforsu kria kondisaun uluk, hafoin muda vendedór sira ba merkadu Olobai.

“Ekipa ne’ebé ita forma ha’u fó orden servisu ba kada instituisaun sira-ne’ebé envolve iha ekipa konjuta ida-ne’e. Ami-nia tarjetu agora ba oin  ami sei  hadi’a odamatan merkadu Olobai nian, dada bee-moos, eletrisidade, sentina públiku  no estrada. Nune’e mós merkadu Olobai  sei tau postu seguransa ida  hodi kontrola ema labele kria problema. Ekipa konjunta ida-ne’e rezolve hotu kondisaun sira-ne’e  mak foin muda vendedór sira”, nia kompromete.

Tuir planu ekipa konjuta, sesta (05/07) hahú halo limpeza iha merkadu Olobai laran no sei bandu komunidade sira husik animál sira hanesan fahi, bibi no karau atu estraga fasilidade merkadu referidu.

Ramata forma ekipa konjunta ba halo identifika morru hala’u merkadu Olobai no odamatan rua ho kondisaun aat, PAM orienta ona EDTL,E.P no BTL, E.P sei responde ba bee no ahi iha merkadu laran.

Iha vizita merkadu ne’e lidera husi PAM Viqueque ekipa SEATOU, MKI, komadante PNTL munisípiu Viqueque, liña ministerial no autoridade komunitária sira.

Notisia relevante:PAM Viqueque ho ekipa SEATOU halo identifikasaun ba abitante okupa espasu públiku

Jornalista   : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!